को को हुन् ५ नम्बर प्रदेशको राष्ट्रियसभा निर्वाचनमा भोट नहाल्ने मतदाता ?

दाङ, २४ माघ । दाङमा भएको राष्ट्रियसभा निर्वाचनको मतदानमा दुई मत खसेन । जम्मा ३ सय ५ मतदाता रहेको ५ नम्बर प्रदेशमा ३ सय ३ मतमात्रै खसेको छ । दुईजना मतदाता भने अनुपस्थित रहेका छन् ।

राष्ट्रियसभा निर्वाचनमा अनुपस्थित हुनेमा रुपन्देहीकी प्रदेशसभा सदस्य बिना पन्त र बाँकेको गाउँपालिका अध्यक्ष इस्तियाद अहमद साह रहेका छन् । घोराहीस्थित कर्मचारी मिलन केन्द्रमा बिहान १० बजेदेखि दिउँसो ३ बजेसम्म मतदान भएको थियो ।

प्रदेशसभा सदस्यतर्फ ८६ र स्थानीय तहतर्फ २१७ मत खसेको छ । ८७ जना प्रदेशसभा सदस्य र २ सय १८ जना स्थानीय तहका प्रमुख र उपप्रमुख, अध्यक्ष र उपाध्यक्ष मतदाता रहेको पाँच नम्बर प्रदेशमा स्थानीय तहतर्फ १०१ महिला र ११६ पुरुष गरी जम्मा २१७ जनाले मतदान गरेका हुन् । त्यस्तै प्रदेशतर्फ ३१ महिला र ५५ पुरुष गरी ८६ जनाले मतदान गरेका हुन् ।