क्यानडा जान रोकिएका उपकुलपति प्राडा कोइरालामाथि आरोपहरु थपिँदै

काठमाडौं, २८ असार । नेपाल संस्कृत विश्वविद्यालयका उपकुलपति कोइरालामाथि लागेको अनियमितताको आरोपमा सरकारले छानविन शुरु गरेको बताएको छ । उनीमाथि रजिस्ट्रारलाई कुटपिट गरेको, १३ आंगिक क्याम्पसमा प्राचार्य नियुक्ति ऐनविपरीत गरेको र काठमाडौंमा बसेर घरमै विश्वविद्यालय चलाएको लगायतका अभियोग पनि थपिएका छन् ।

विश्वविद्यालयको केन्द्रीय कार्यालय दाङको बेलझुण्डीमा भए तापनि कोइराला काठमाडौंमै बस्दै आएका छन् । उनी कांग्रेसनिकट प्रजातन्त्रवादी प्राध्यापक संघका पूर्वअध्यक्ष भएकाले पार्टी काममा बढी सक्रिय हुँदा विश्वविद्यालय लथालिङ्ग अवस्थामा पुगेको शिक्षाध्यक्ष र कुलसचिवले कुलपति एवं प्रधानमन्त्री केपी शर्मा ओलीलाई जानकारी गराएका छन् । उपकुलपतिमाथिको छानबिन अघि बढेको र अहिलेको विवादले यो नरोकिने प्रधानमन्त्री ओलीले बताइरहेका छन् ।

उपकुलपति कोइरालाले कांग्रेसनिकट कर्मचारी संगठनका अध्यक्ष लगाएर आफूलाई कुटपिट गरेको भन्दै विश्वविद्यालयका कुलसचिव कार्तिकेय झाले धेरै पहिले उजुरी गरेका थिए । प्रगतिशील प्राध्यापक संघको ज्ञापनपत्र बुझेर झालाई सो ज्ञापनपत्र हस्तान्तरण गर्न कोइरालाको घरमा गएका बेला ढोका थुनेर कुटपिट गरिएको संगठनका उपाध्यक्ष कृष्ण न्यौपानेले बताए । यद्यपि, यो घटना केही महिना अघिको हो ।

उपकुलपति कोइरालाले भने कम्युनिस्ट सरकारविरुद्ध कांग्रेसले साथ दिएमा आफू ओलीसँग लड्न तयार रहेको बताएका छन् ।