‘गाई कि त्रिशुल’ खेलेर गणतन्त्र ल्याएको होइनः प्रम ओली

काठमाडौं । प्रधानमन्त्री केपी शर्मा ओलीले संघीय लोकतान्त्रिक गणतन्त्र भिक्षा मागेर नपाएको बताएका छन् । प्रतिनिधिसभाको अधिवेशन समापनमा बोल्दै प्रधानमन्त्रीले नेपाल कुनै हालतमा पछाडि फर्कन नसक्ने बताए ।

“जोगीले फेरी लगाएजस्तो जनताले फालिसकेको राजतन्त्र ल्याउँछौं भन्दै केही मान्छे फेरी लगाएर हिडेका छन्,” प्रधानमन्त्री ओलीले भने, “२५० वर्षअघि घलेहरुले बुझेका थिए, जन्मसिद्ध राजा हुँदैन । दौडेरै भए पनि जित्नैपर्छ ।”

प्रधानमन्त्री ओलीले प्रतिगमनको सम्भावना नरहेको उल्लेख गर्दै अनावश्यक चलखेल नगर्न सचेत गराए । “लोकतन्त्र भिक्षा मागेर ल्याएको होइन । गाई कि त्रिशुल खेलेर ल्याएको होइन । गणतन्त्र रगत बगाएर ल्याएको हो,” प्रधानमन्त्रीको भनाइ छ, “राजतन्त्र–राजतन्त्र भनेर धेरै फट्याकफुटुक नगरे हुन्छ ।”

विप्लव समूहलाई पटकपटक हिंसात्मक गतिविधि त्याग्न आग्रह गरेको स्मरण गर्दै प्रधानमन्त्री ओलीले सरकारले बाध्य भएर उक्त समूहका गतिविधि प्रतिबन्धित गरेको उल्लेख गरे । “लोकतान्त्रिक अभ्यासको उच्चतम अभ्यास चुनाव हुन नदिने, निर्दोष मान्छे मार्ने, अंगभंग गर्ने, यस्तो नगर्न आग्रह गरियो,” विप्लव समूह कतै दर्ता नभएको बताए ।

“त्यस समूहका आपराधिक क्रियाकलाप माथि निषेध गरिएको हो । त्यसो गर्दा कतिलाई हनहनी ज्वरो आयो । बम पड्काउन पाउने, चन्दाका नाममा लुट्न पाउने कुरा लोकतन्त्रको नाममा हुन्छ ?” प्रधानमन्त्रीको भनाइ छ ।