छोरीको विवाह तयारी भइरहेका बेला घरमा आगो लागेपछि…

सप्तरी । सप्तरीको एक छोरीको विवाहका लागि सामान जोहो गरिरहेको एक परिवारमो घरमा आगलागी भएपछि सबै जलेको छ । नगदसहित सम्पूर्ण सामान आगलागीमा जलेर खरानी भएपछि सप्तरीको सुरुंगा नगरपालिका– ९ प्रमाणपुरका परिवार चिन्तित छन् ।

धुमधामका साथ छोरीको बिहे गर्छु भन्ने ठूलो सपना देखेका प्रमाणपुरका स्थानीय विद्यालाल मण्डलको अहिले चिन्तित छन् । चैत २ गते अचानक भएको आगलागीमा छोरीको विवाहका लागि साहुमहाजनसँग ऋण लिएर जोहो गरेको नगद, गरगहना, अन्नपातलगायतका सबै समान जलेर नष्ट भएपछि चिन्तित बनेका हुन् ।

बिहेको सबै तयारी हुँदै थियो, समान पनि किनेर घर भित्र्याइसकेको बेला आगलागी हुँदा क्षति भएको मण्डलले भने । अचानक बस्तीमा आगलागी भएपछि सबै सामान जलेर खरानी हुँदा ठूलो संकटमा परेको बताए ।

आगलागीले न त टाउको लुकाउने ठाउँ रह्यो न त एक मुठी अन्न, अब कसरी छोरीको विवाह गर्ने भन्ने ठूलो चिन्तामा परेको उनले बताए । जेठी छोरी मञ्जु कुमारीको यही वैशाख ४ गते सिरहाको लहानमा विवाहको तय गरिएको छ ।

आगलागीपछि सात जनाको परिवार त्रिपालमुनि दिन बिताउँदै आएका छन् । स्थानीय बद्री मण्डलको घरबाट सल्केको आगो फैलिएर आगलागी हुँदा मण्डलसहित स्थानीय आठ परिवारको १० वटा घर जलेर नष्ट भएको थिए ।