जोशीलाई कायममुकायम प्रधानन्यायाधीशको पद निल्नु न ओकल्नु

काठमाडौं, १७ साउन । दुई तिहाई लिएर सरकार चलाइरहेको नेपाल कम्युनिष्ट पार्टीसामु गरेको बाचा पूरा नगर्दा कायममुकायम प्रधानन्यायाधीश दीपकराज जोशीलाई अहिले कायममुकायम प्रधानन्यायाधीश पद पनि निल्नु न ओकल्नु भएको छ । आजको नेपाल समाचारपत्रले यो समाचार छापेको छ ।

एक उच्च स्रोतका अनुसार वर्तमान सरकारले केही दिनअघि पूर्ववर्ती देउवा सरकारले गरेका राजनीतिक नियुक्ति खारेज गर्नुअघि जोशीसँग सोका विरुद्ध अदालतमा रिट परेमा ती सबै रिटउपर कुनै निर्णय नलिने सहमति भएको थियो । सरकारले गरेका ती निर्णयविरुद्ध पूर्व सरकारका राजनीतिक नियुक्तिधारीहरू सर्वोच्च अदालत जानेबित्तिकै त्यसउपर देउवा सरकारकै निर्णयलाई नैतिक बल पुग्ने गरी अन्तरिम आदेश जारी भएको थियो ।

“त्यहीबेलादेखि सरकारसामु जोशीले विश्वास गुमाए र उनी अहिले आफ्नै कारण पनि विवादमा मुछिए”, समाचार स्रोतले भन्यो, “खासगरी यसको “इनिसियसन” सञ्चार तथा सूचना प्रविधिमन्त्री एवम सरकारका प्रवक्ता गोकुल बास्कोटाले लिनुभएको थियो ।” समाचारमा लेखिएको छ, “नेकपाका एक नेताले पनि समाचार स्रोतको उक्त दावीलाई पुष्टि गर्ने गरी आफ्नो अभिव्यक्ति दियो । उक्त स्रोतले जोशी धेरै विवादमा तानिइसकेकाले अब नयाँ प्रक्रियाबाट प्रधानन्यायाधीश नियुक्त गरिने दावी गरे ।