डा. गोविन्द केसीले शुरु गरे १५औं अनसन- प्रदेश २ लगायत यी ६ ठाउँमा मेडिकल कलेज माग

शिखरन्युज १७ असार – डा. गोविन्द केसी जुम्ला पुगेर शनिबारदेखि १५औं अनसन शुरु गरेका छन् । संसदमा लगेको चिकित्सा विधेयकको विरोधमा उनी जुम्ला सदरमुकाम खलंगामा अनसन शुरु गरेका हुन् ।

उनले प्रदेश नम्बर २ लगायत देशका विभिन्न ६ ठाउँमा सरकारी मेडिकल कलेज स्थापनाको मागलाई उठाएका छन् । उनले प्रदेश २, पाँचथर, इलाम, डडेल्धुरा, डोटी, उदयपुरमा समेत सरकारी मेडिकल कलेज स्थापनाको माग गरेका हुन् ।

केसीले ७ बुँदे अनसनका माग सार्वजनिक गरेका छन् । उनको पहिलो माग चिकित्सा शिक्षा ऐन तत्काल जारी गर्न छ । त्यसैगरी कर्णाली स्वास्थ्य विज्ञान प्रतिष्ठानमा अविलम्ब एमबीबीएस तहका विद्यार्थी भर्ना गर्ने व्यवस्था गरियोस् माग छ ।

राप्ती स्वास्थ्य विज्ञान प्रतिष्ठान र गेटा मेडिकल कलेजको काम शीर्घ अघि बढाउँदै पाँचथर, इलाम, डडेल्धुरा, डोटी, उदयपुरमा समेत सरकारी मेडिकल कलेज स्थापना गर्न माग गरेका छन् । त्यसैगरी डाक्टर केसीले माइतीघर मण्डला क्षेत्रमा प्रदर्शन गर्न पाउनुपर्ने माग राखेका छन् । सरकारले भर्खरै मात्र नारा, जुलुस गर्ने निश्चित ठाउँ तोकेको छ ।

डाक्टर केसीले गौरीबहादुर कार्की प्रतिवेदनले दोषी ठहर्याएका पदाधिकारीलाई सिफारिस अनुसार कार्वाहीको माग गरेका छन् । विश्वविद्यालय पदाधिकारी मापण्ड निर्धारण समितिको प्रतिवेदन कार्यान्वयन पनि उनको अर्को माग रहेको छ । स्नातकोत्तर तहको छात्रबृत्तिपछि २ वर्ष अनिवार्य सेवाको व्यवस्था माग गरेका छन् । आगामी शैक्षिक सत्रदेखि सबै निजी संस्थाहरुमा समेत चिकित्साको स्नातकोत्तर तह निःशुल्क गर्न माग राखेका छन् ।

बन्द रहेको जानकी मेडिकल कलेजका विद्यार्थीलाई उचित व्यवस्थापन गर्दै कलेज बन्द गर्नेलाई कार्वाहीको माग गर्दै प्रदेश २ मा सरकारी मेडिकल कलेज खोल्न माग गरेका छन् ।

यता सरकारले डा. गोविन्द केसी अनशन सुरु गर्न जुम्ला हिँडेकै दिन सरकारले विधेयक मन्त्रिपरिषद्बाट पारित गरेको छ। डा. केसी अनशन सुरु गर्न बिहीबार जुम्ला हिँडेका थिए । मन्त्रिपरिषद्ले सोही दिन प्रतिस्थापन विधेयक पारित गरी शुक्रबार संसद् सचिवालयमा दर्ता गराएको थियो।