देउवा सरकारले छ महिनामा २८ कराेड खर्च गर्दा अाेली सरकारले कति खर्च गर्याे?

काठमाडौँ, २८ साउन । वर्तमान सरकार आर्थिक रुपले अघिल्लो सरकार भन्दा मितव्ययी देखिएको छ । सरकारले सार्वजनिक गरेको पाँच महिने उपलब्धिमा पूर्ववर्ती सरकार भन्दा वर्तमान सरकार मितव्ययी भएको देखिएको हो । पूर्ववर्ती सरकार र वर्तमान सरकारले वितरण गरेको आर्थिक सहायता, चन्दा र पुरस्कार (आसचपु) मा निकै अन्तर छ । काँग्रेस सभापति शेरबहादुर देउवा नेतृत्वको सरकारले ६ महिनाको अवधिमा २८ करोड ९८ लाख २७ हजार ७० रुपैयाँ वितरण गरेको थियो भने नेकपाका अध्यक्ष केपी शर्मा ओली नेतृत्वको वर्तमान सरकारले गएको पाँच महिनाको अवधीमा २ करोड ४२ लाख मात्र वितरण गरेको छ ।

ओली गएको फागुन ३ गते प्रधानमन्त्री नियुक्त भएका थिए । उनी प्रधानमन्त्री भएको केही दिनमा ६ महिना पुग्दैछ । पाँच महिने उपलब्धि सार्वजनिक गर्ने क्रममा जारी गरिएको पुस्तिकामा गृह मन्त्रालयबाट आर्थिक सहायता, चन्दा, पुरस्कार अन्तर्गत २०७४ साउनदेखि पुससम्म २ हजार १ सय ८९ जनालाई २८ करोड ९८ लाख २७ हजार ७० रुपैयाँ वितरण गरिएको’ उल्लेख गरिएको छ ।

यो सरकार बनेपछि २०७४ माघदेखि ०७५ असारसम्म, आन्दोलनका क्रममा जीवन गुमाएका ११ जनाको जनही रु १० लाखका दरले वितरण गरिएको १ करोड १० लाख सहित जम्मा २ करोड ४२ लाख मात्र वितरण भएको उल्लेख गरिएको छ । पुस्तिकामा यो सरकार बनेपछि २०७४ माघदेखि २०७५ असारसम्म’ भन्ने उल्लेख भएपनि ओली सरकार २०७४ फागुनमा मात्र बनेको थियो ।