निर्वाचन आयोगमा २१ दल दर्ता

काठमाडौं । आगामी मंसिरमा हुने उपनिर्वाचनका लागि २१ वटा दल दर्ता भएका छन् । निर्वाचन आयोगका अनुसार उपनिर्वाचनमा भाग लिन सत्तारूढ दलहरू नेपाल कम्युनिष्ट पार्टी नेकपा र समाजवादी पार्टीसमेत गरी २१ वटा दल दर्ता भएका छन् ।तत्कालीन नेकपा एमाले र माओवादी केन्द्र मिलेर नेकपा बनेपछि उपनिर्वाचनमा भाग लिन दल दर्ता भएको हो । त्यसैगरी अर्को सत्ता साझेदार समाजवादी पार्टी पनि दर्ता भएको छ । तत्कालीन संघीय समाजवादी पार्टी नेपाल र नयाँ शक्ति एकीकरण भएपछि बनेको समाजवादी पार्टीले दल दर्ता गरेको हो ।

पहिलोपटक भदौ १६ गते सूचना प्रकाशित गर्दै आयोगले उपनिर्वाचनमा भाग लिनका लागि भदौ मसान्तसम्मको समय दिएको थियो । आयोगका उपसचिव तथा सूचना अधिकारी सूर्यप्रसाद अर्यालका अनुसार मंगलबार सम्म २१ वटा दल उपनिर्वाचनमा भाग लिनका लागि दर्ता भएका छन् । उपनिर्वाचन मंसिर १४ गतेका लागि तोकिएको छ । वि।स। २०७४ सालको स्थानीय, प्रदेश र प्रतिनिधि निर्वाचनपछि एकीकरण भएका वा गाभिएर नयाँ नाममा दर्ता भएका दलले उपनिर्वाचनमा भाग लिन दल दर्ता हुनुपर्ने प्रावधान छ । २०७४ सालमा सम्पन्न तीन तहको निर्वाचनमा आयोगमा दर्ता भएका राजनीतिक दलले उपनिर्वाचनका पुनः दर्ता गर्नुपर्ने बाध्यता नरहेको उनले बताए ।

आयोगका अनुसार उपनिर्वाचनमा भाग लिनका लागि दर्ता भएका अन्य दलहरूमा मंगोल नेसनल अर्गनाइजेसन, मुस्कान सेना नेपाल पार्टी, साझा पार्टी, नेपाल परिवार दल, राष्ट्रिय प्रजातन्त्र पार्टी ९प्रजातान्त्रिक०, नेपालवाद, राष्ट्रिय नागरिक पार्टी र राष्ट्रिय प्रजातन्त्र पार्टी ९संयुक्त० छन् ।

त्यसैगरी, नेपाल लोकतान्त्रिक पार्टी, नेपाल कम्युनिष्ट पार्टी संयुक्त, खुम्बुवान लोकतान्त्रिक पार्टी, नेपाली कांग्रेस वीपी, ग्रीन पार्टी नेपाल, ऐतिहासिक प्रजातान्त्रिक जनता पार्टी, आमूल परिवर्तन मसिहा पार्टी नेपाल, साझा पार्टी र हाम्रो पार्टी छन् । २०७४ को स्थानीय तह निर्वाचनमा ८० दल र प्रदेशसभा तथा प्रतिनिधिसभा सदस्यको निर्वाचनमा ९२ दल दर्ता भएका थिए ।