नेवार समुदायले दसैँको राती खड्ग जात्रा पर्व मनाए

काठमाडौं, असोज १५ – काठमाडौं उपत्यका सहित विभिन्न जिल्लामा गएराती खड्ग जात्रा पर्व मनाइएको छ । विजया दशमीका दिन हिजो नेवार समुदायले निकाल्ने खड्ग जात्रामा विभिन्न शक्तिपीठमा तन्त्र साधना गरी खड्ग धारणा गरी टोल तथा गुठीका मानिस निस्किएका थिए ।

काठमाडौंमा टेःबहाल र वटुबाट भद्रकाली, कोहिटीबाट नीलवाराही, यट्खाबाट कंकेश्वरी र तलेजु भवानी लगायतका पीठबाट खड्गजात्रा निकालिएको हो । खड्ग धारण गरेर नगर परिक्रमा गरिसकेपछि आसूरी प्रवृत्तिको प्रतीक कुभिण्डोलाई खड्गले प्रहार गरी जात्रा सम्पन्न गरिन्छ ।

खड्ग जात्रामा शक्तिपीठबाट तन्त्र साधना गरी बेलुकी देवदेवीको मूर्ति रहेको शक्तिपीठको मूल घरबाट खड्ग जात्रा निकालिन्छ । कीर्तिपुरमा पनि महिलाले खड्ग जात्रा निकालेका छन् । यहाँका महिलाले खड्गको सट्टा सिन्दूरकदानी बोकेर नगर परिक्रमा गरि खड्ग जात्रा निकाल्ने परम्परा छ ।

परम्परागत साँस्कृतिक बाजागाजाका साथ ठाउँ ठाउँमा भैरव र पीठ पूजासमेत गरिएको थियो ।नगर परिक्रमापछि काठले बनेको नाटेश्वरको अमूर्त मूर्ति आकाश भैरवको मन्दिरमा विशेष पूजा गरी भित्रयाईएको थियो ।