दाङका सबै सरकारी विद्यालय पढ्ने विद्यार्थीका हातमा किताव, कापी र शिक्षण सामग्री

दाङमा राष्ट्रिय प्रारम्भिक कक्षा पढाइ कार्यक्रमका शैक्षिक सामग्री वितरण शुरु

दाङ, १५ बैशाख । राष्ट्रिय प्रारम्भिक कक्षा पढाइ कार्यक्रमका लागि दाङमा शैक्षिक सामग्री वितरण शुरु भएको छ । जनता माध्यमिक विद्यालय कालाकाटेमा शुक्रवार एक कार्यक्रमको आयोजना गरी शैक्षिक सामग्री वितरण कार्यको शुभारम्भ गरिएको हो ।

शैक्षिक सामग्री वितरण कार्यक्रमलाई शुभारम्भ गर्दै शिक्षा विकास तथा समन्वय एकाई दाङका शाखा अधिकृत अधिकृत देवमणि चौधरीले सरकारी विद्यालयहरुको शैक्षिकस्तर खस्कँदै गइरहेको सन्दर्भमा मुलुकका १६ वटा जिल्लामा राष्ट्रिय प्रारम्भिक पढाइ कार्यक्रम सघनरुपमा लागू भएको चर्चा गर्दै अब शैक्षिक गुणस्तर बृद्धिमा दत्तचित्त भएर लाग्नुपर्ने बताए । प्रारम्भिक कक्षा पढाई कार्यक्रम (इजीआरपी)का दाङ जिल्ला संयोजक हल्लुप्रसाद चौधरीले यसपटक कक्षा १, २ र ३ का प्रत्येक विद्यार्थीहरुको हातहातमा पुग्नेगरी शैक्षिक सामग्रीहरु आएको जानकारी दिँदै यसको व्यवहारिक र कुशल प्रयोग र सदुपयोगका लागि आग्रह गरेका थिए । उनले जिल्लाका प्रत्येक विद्यालयबाट २ जना शिक्षकहरुलाई १० दिने तालिम र ५ दिनको फिल्ड प्रोजेक्ट गराएर विद्यालयमा पठनपाठन गराइने जानकारी दिए ।

कार्यक्रममा बोल्दै गढवा गाउँपालिकाका शिक्षा प्रमुख एवं स्रोतव्यक्ति मोहनकुमार दाहालले राष्ट्रिय प्रारम्भिक पढाई कार्यक्रमलाई प्रभावकारीरुपमा विद्यालयमा सञ्चालन गर्न सबैमा आग्रह गरे । विद्यालय व्यवस्थापन समितिका अध्यक्ष भीमबहादुर केसीले यो कार्यक्रमलाई प्रभावकारी बनाएर विद्यालयको शैक्षिक सुधारका लागि व्यवस्थापन समितिको तर्फबाट जुनसुकै चुनौतिको पनि सामना गरेर अगाडि बढ्ने प्रतिवद्धता जनाए ।

कार्यक्रममा विद्यालयका प्रधानाध्यापक लोकेन्द्र केसी, सहायक प्रधानाध्यापक भानु जीएम, सरस्वती मावि गोबरडिहाका प्रधानाध्यापक कुलचन्द्र पौडेल, गढवा गाउँपालिका– १ का वडाध्यक्ष बाबुराम अधिकारी, शिक्षक अभिभावक संघका अध्यक्ष कृष्ण गिरी, शिक्षक अभिभावक संघ सदस्य जसबहादुर रोका, विद्यालय व्यवस्थापन समितिका सदस्य पवित्रा जीसीलगायतले राष्ट्रिय प्रारम्भिक पढाई कार्यक्रमअन्तर्गत आएका शैक्षिक सामग्रीहरु उपयोगी देखिएको र यसको सदुपयोगमा जोड दिएका थिए ।

यो कार्यक्रमअन्तर्गत दाङमा रहेका जम्मा ४ सय २० सरकारी विद्यालयहरुमा कक्षा १, २ र ३ का विद्यार्थीहरुका लागि शैक्षिक सामग्री वितरण हुँदैछ । यी शैक्षिक सामग्रीहरुलाई विद्यालयमा कुशलतापूर्वक अध्ययन र अध्यापन गर्न तथा गराउनका लागि जिल्लास्तरमा तालिम भइसकेको छ । दोस्रो चरणमा छिटै प्रत्येक स्थानीय तहमा स्थापित स्थानीय शिक्षा एकाईस्तरमा प्रत्येक विद्यालयबाट २ जना शिक्षक÷शिक्षिकाहरुका लागि तालिम सञ्चालन हुँदैछ ।