पत्नी सिताको उच्च- ब्लडप्रेसरको बहाना बनाइ किन जादैछन प्रचण्ड थाइल्यान्ड ?

काठमाडौँ : नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ भोलि आकस्मिक रुपमा थाइल्यान्ड जाने तय भएको छ।

सरकारी समाचार एजेन्सी राससले यसअघिकै कार्यतालिकाअनुसार पत्नी सीताको फलोअपका लागि अध्यक्ष दाहाल थाइल्यान्ड जान लागेको भन्दै उनका प्रेस संयोजक मनोहरि तिमिल्सिनालाई उद्‍धृत गरेको छ।

तर सीता दाहाल बिरामी भएको र उपचार भएको बारे अहिलेसम्म कुनै समाचार वा जानकारी सार्वजनिक भएको थिएन।

सचिवालयलाई उद्‍धृत गर्दै राससले ‘लामो समयदेखि उच्च रक्तचाप लगायतका समस्याबाट पीडित सीताको नियमित स्वास्थ्य परीक्षणबाहेक अन्य कुनै कार्यसूची नरहेको’ उल्लेख गरेको छ।

जबकि उच्च रक्तचाप अर्थात् हाइ ब्लड प्रेसरको उपचारका लागि थाइल्यान्डसम्म जानु पर्ने कुनै कारण देखिन्न। उच्च रक्तचापको उपचार नेपालमै सम्भव छ। थाइल्यान्डको कुन अस्पतालमा उपचार हुने हो, त्यसबारे पनि सचिवालयले केही जनाएको समाचारमा उल्लेख छैन।

प्रचण्ड आगामी शुक्रबार स्वदेश फर्कने कार्यक्रम रहेको छ।