पूर्वसभामुख ढुङ्गानाले सभामुख महरालाई के भने ?

काठमाडौं, २२ चैत । सभामुख कृष्णबहादुर महराले पूर्वसभामुख दमननाथ ढुङ्गानासँग भेटवार्ता गरेका छन् । सभामुख महराले आज (बिहीबार) बिहान बानेश्वरस्थित ढुङ्गानाकै कार्यकक्षमा भेटवार्ता गरेका हुन् ।

भेटमा पूर्वसभामुख ढुङ्गानाले संघीय संसद प्रतिनिधि सभाको पहिलो सभामुखमा सर्वसम्मत भएकोमा बधाई तथा कार्यकाल सफलताको शुभकामना दिएका थिए । प्रतिनिधि सभाले अहिले उपयुक्त नेतृत्व पाएको पूर्वसभामुख ढुङ्गानाले बताए ।

“तपाईंको व्यक्तित्वअनुसार नै सुहाउने पद हो यो”, पूर्वसभामुख ढुङ्गानाले भने, “तपाईंले सत्तापक्ष र प्रतिपक्षलाई मिलाएर अगाडि लैजान सक्नुहुन्छ भन्ने विश्वास लिएको छु ।”

अब संसदलाई कस्तो बनाउने भन्ने कुरा सभामुखको हातमा रहेको भन्दै ढुङ्गानाले संसदलाई साँच्चिकै जनताको आवाज बोल्ने प्रतिनिधि संस्थाको रुपमा विकास हुनेमा आशा गरेको बताए ।

सो अवसरमा सभामुख महराले पूर्व सभामुख ढुङ्गानालाई विगतको अनुभवसहित सल्लाह, सुझाव र सहयोग गर्न अनुरोध गरेका थिए । २०४८ सालमा पहिलोपटक आफू सांसद हुँदाको स्मरण गर्दै सभामुख महराले भने, “मेरो पहिलो सभामुख नै तपाईं हो । तपाईंबाट मलाई धेरै सहयोग हुनेछ भन्ने आशा गरेको छु । तपाईंले विगतमा खेलेको भूमिका र अनुभवले मेरो जिम्मेवारी पूरा गर्न धेरै सजिलो हुन्छ भन्ने लागेको छ ।’

पूर्वसभामुख ढुङ्गानासँगको भेटघाटमा अधिकारकर्मीहरु पद्मरत्न तुलाधर, वीरेन्द्रप्रसाद मिश्र, विद्याधर मल्लिक लगायतको पनि उपस्थिति रहेको थियो ।