पैसा लिएर लाइसेन्स दिने ८ जना कम्प्युटर अपरेटरलाई भ्रष्टाचार मुद्दा

काठमाडौं । पैसा लिएर चालक अनुमती पत्र अर्थात लाइसेन्स दिलाउनेहरुलाई अख्तियारले भ्रष्टाचार गरेको भन्दै ८ जना कम्प्युटर अपरेटरलाई मुद्दा दर्ता गरेको छ ।

यातायात व्यवस्था सवारी चालक अनुमतिपत्र कार्यालय प्रदेश ३ बागमती ललितपुरबाट परीक्षामा फेल भएका, ट्रायल परीक्षा नदिएकाहरुले समेत सवारी चालक अनुमति पत्र दिने गरेका छन् ।
अख्तियार दुरुपयोग अनुसन्धान आयोगले उजुरीको आधारमा अनुसन्धान गरेको थियो ।

२०७५ साउन १६ देखि असोज २४ सम्म एकान्तकुना कार्यालयबाट लिएका विभिन्न वर्गका सवारी चालक अनुमतिपत्रको परीक्षामा फेल भएका, परीक्षा नै नदिएका, चेकलिष्टमा नाम समावेश नभएकासमेत गरी ६ सय २९ वटा लाइसेन्स फेरबदल गरेको भेटाएको हो ।

तिनीहरुको नतिजा फेरवदल गरी सवारी चालक अनुमति पत्र दिनेहरुलाई मुद्दा दर्ता गरेको छ । लाइसेन्स दिने काममा संलग्न रहेका यातायात व्यवस्था सवारी चालक अनुमति पत्र कार्यालय बागमती एकान्तकुनामा कार्यरत शाखा अधिकृत भक्तबहादुर विष्ट¸ शाखा अधिकृत विष्णुप्रसाद सुवेदी¸ यातायात व्यवस्था सवारी चालक अनुमति पत्र कार्यालय ठुलोभर्याङ काठमाडौंका कम्प्युटर अधिकृत विजेन्द्र राज जोशी¸ यातायात व्यवस्था सवारी चालक अनुमतिपत्र कार्यालय एकान्तकुनामा कार्यरत कम्प्युटर अपरेटर जयनारायण चौधरी¸ कम्प्युटर अपरेटर सचिनकुमार सिंह¸ तत्कालीन यातायात व्यवस्था सवारी चालक अनुमतिपत्र कार्यालय एकान्तकुना हाल कम्पनी रजिष्ट्रारको कार्यालय त्रिपुरेश्वरका कम्प्युटर अपरेटर अमितकुमार साह¸ हाल मेची यातायात व्यवस्था कार्यालयका कम्प्युटर अपरेटर विजयराम बनमाला, हाल प्रदेश २ आर्थिक मामिला तथा योजना मन्त्रालयका कम्प्युटर अपरेटर मदनकुमार साहसमेत ८ जनालाई भ्रष्टाचार गरेको भन्दै मुद्दा दर्ता भएको छ ।

उनीहरुलाई भ्रष्टाचार निवारण ऐन¸ २०५९ को दफा १३ को कसुरमा सोही दफा बमोजिम हदैसम्मको जरिवाना र कैद सजाय मागदाबी लिई विशेष अदालत काठमाडौंमा आरोपपत्र दर्ता गरिएको अख्तियारले जनाएको छ ।