पोखरामा फेरी महायोग साधना तथा दीक्षा कार्यक्रमको तयारी

पोखरा २५ फागुन 

पोखरा लेखनाथ महानगरपालिका वडा नं. ३ नदिपुरमा रहेको नारायण स्थान धार्मिक विकास समिति, पाशुपत महायोग सिद्ध साधना केन्द्रको आयोजनामा पोखरामा वृहत महायोग साधना एवम् दीक्षा कार्यक्रम हुने भएको छ ।

महायोगी सिद्धबाबा श्री १००८ डा. श्री वैष्णव कृष्णदासजी महाराजको समुपस्थितिमा हुने साधना फागुन २६ गतेदखि २९ गतेसम्म नदीपुरस्थित साधना केन्द्रमा गरिने केन्द्रका संयोजक भोला वरालले वताए । उनले साधना विहान पौने ६ वजे र बेलुका ४ वजे गरि दैनिक दुई पटक गरिने पनि जानकारी गराएका छन् ।

जन्मजन्मान्तरका संग्रहीत पुण्य संस्कारहरुको प्रबल उदयका कारण उत्पन्न वैराग्यले बाल्यावस्थामै गृह त्याग गरी अध्यात्म पथमा समर्पित महायोगी सिद्धबाबाले श्रीधाम अयोध्यास्थित श्रीमणिरामदासजीको छाउनीपीठबाट आदि–वैदिक–सनातन–रामानन्दीय ‘श्री’ सम्प्रदाय अन्तर्गतको वैष्णव सन्यास दीक्षामा दीक्षित भएका डा. कृष्णदासजी महाराजको समुपस्थितिका हुने ध्यान साधना कार्यक्रमबाट धेरैले सेवा पाउने पनि वरालले वताए ।

वि.सं. २०६५ साल र वि.सं. २०७२ सालको रामनवमीको अवसर पारी सुनसरी जिल्लाको प्राचिन चतराधाम र कास्की जिल्लाको पोखरामा विना अक्सिजन नौ दिने ‘भू–समाधि’ लिनुभएको वरालले वताए ।

साथै उनले महायोग ध्यान गर्नाले मानिसमा तनाव दुरहुने रोग व्याधिसंग लड्न सक्ने क्षमता वृद्धि हुने साथै महायोग गर्दा साधक आफैले केही नगरी आफै हुने उनले वताए ।