प्रजातान्त्रिक योद्धा मिश्रको सम्झना, यसो भने निधिले

जनकपुरधाम, पुस ६ । नेपाली काँगे्रसका नेता विमलेन्द्र निधिले प्रजातान्त्रिक योद्धाहरूको संघर्ष र योगदानले नै मुलुकमा संघीय लोकतान्त्रिक गणतन्त्रात्मक पद्धति स्थापना भएको बताएका छन् ।

प्रजातान्त्रिक योद्धा रामनारायण मिश्रको ५०औँ स्मृति दिवसका अवसरमा आज आयोजित सभामा उनले लोकतान्त्रिक पद्धतिमाथि मडारिरहेको खतराप्रति सबै सजग हुनुपर्ने विचार व्यक्त गरे

उनले देश र दललाई पर्यायवाची ठान्ने मनोविज्ञान लोकतन्त्रका लागि खतरा भएको धारणा राखे ।

विगतको नेपालको राजनीतिक प्रयोगशालामा अनेक सिद्धान्त र पद्धति रूपान्तरण भएको चर्चा गर्दै उनले लोकतान्त्रिक पद्धति आत्मसात् गरिसकेका कम्युनिस्टहरूमा हाल आएर अधिनायकवादी एकदलीय सिद्धान्ततर्फ उन्मुख हुने संकेत देखा पर्नु दुर्भाग्यपूर्ण हो भने   ।

रामनारायण स्मारक समितिका सदस्य किशोरी साहले नेपालको लोकतान्त्रिक आन्दोलनमा मिश्रको योगदान उल्लेखनीय रहेको चर्चा गर्दै मिश्रले निर्माण गराएका विकासका पूर्वाधारको रक्षाको खाँचो औँल्याए ।