प्रधानमन्त्री देउवाको हातमा यी तीन जनाको नाम: कसले मार्ला बाजी ?

काठमाडौं, पुस ३० ।  २ नम्बर प्रदेशको प्रमुख को बन्ने भन्ने शनिबारबाट दौड सुरु भएको छ । सरकारले अब बस्ने मन्त्रिपरिषदको बैठकमा प्रदेश प्रमुख नियुक्ती गर्दैछ । सोही अनुसार प्रदेश प्रमुखका लागि मधेशवादी दलले पनि आफ्नो दावी पेश गर्दै प्रधानमन्त्री शेरबहादुर देउवासमक्ष विभिन्न व्यक्तित्वहरुको नाम सिफारिश गरिसकेको स्रोतको दाबी छ ।

दुई नम्वर प्रदेशमा राजपा र फोरमले बहुमत ल्याएका छन् । उनीहरुले प्रदेश प्रमुख नियक्तिका लागि आ-आफ्नो फेभरका व्यक्तित्वको नाम सिफारिश गरिसकेका छन् । स्रोतका अनुसार राजपा नेपालका अध्यक्ष महन्थ ठाकुर र संघीय समाजवादी फोरम नेपालका अध्यक्ष उपेन्द्र यादव दुवै नेताले आ-आफनो फेभरका व्यक्तिको नाम प्रधानमन्त्री देउवालाई बुझाएका छन् ।

राजपा नेपाल निकट उच्च स्रोतका अनुसार अध्यक्ष ठाकुरले आफ्ना सम्धी उमाकान्त झाको नाम सिफारिश गरेका छन् भने यता उपेन्द्रले रत्नेश्वर कायस्थको नाम बुझाएका छन् । ठाकुर र यादवले सिफारिश गरेका यी दुवैजना नेपाल सरकारका पूर्व सचिव पनि हुन् ।

यता नेपाली कांग्रेसका नेता विमलेन्द्र निधिले पनि देउवालाई भेटेरै नयाँ नाम सिफारिश गरेका छन् । उनले लोकेन्द्र मल्लिकलाई प्रदेश प्रमुख बनाउनुपर्ने डिमाण्ड देउवासामू गरेका छन् ।

मल्लिक पूर्व न्यायाधीश हुन् । मधेशबाट यी तीनजनाको नाम प्रदेश प्रमुख नियुत्तीका लागि प्रधानमन्त्री देउवाको हातमा पुगिसकेको छ ।

प्रधानमन्त्री देउवाले कसलाई प्रमुख बनाउँछन् त यो भने अब चासोको विषय बनेको छ । प्रधानमन्त्री निकट उच्च स्रोतका अनुसार देउवा भने सकेसम्म सहमितबाटै बनाउनुपर्नेमा उभिएका छन् । यदि लाख कोशिश गर्दापनि सफल नभए उनले यी तीन जना कसैलाई पनि नबनाउन सक्ने पनि अनुमान गरिएको छ ।