प्रहरी कार्यालयमा ढुंगामुढा गर्ने रबि लामिछानेका समर्थकलाई मुद्धा लगाउने तयारीमा प्रहरी

चर्चित टेलिभिजन कार्यक्रम सिधा कुरा जनताका प्रस्तोता रवि लामिछानेलाई प्रहरी नियन्त्रणमा लिई चितवन लगेदेखि नै उनका समर्थकले विभिन्न किशिमका प्रदर्शन गरिरहेका छन् । प्रदर्शनमा सहभागि हुन देशैभरबाट सहभागि भइरहेको बुुझिएको छ । लामिछाने सहित आरोपी तीनै जनालाई चितवन लगेकै दिन उनका समर्थकले प्रदर्शन गर्दै प्रहरी कार्यालमा ढुंगामुढा समेत गरेका थिए ।

प्रदर्शनकारीले गरेको ढुंगामुढाका कारण पाँच जना प्रहरी घाइते भएको जिल्ला प्रहरी कार्यालय चितवनले जनाएको छ । प्रदर्शनकारीको प्रदर्शन रोकिने छाँटकाँट नदेखेपछि प्रहरीले निषेधित क्षेत्र नै तोकेको छ । निषेधित क्षेत्रमा पनि प्रदर्शनकारीले बेलाबेला तोडेपछि प्रहरीसँग झडप भइरहेको छ । मंगलबार पनि प्रदर्शनकारी र प्रहरीबीच झडप भएको थियो ।

जिल्ला अदालतले फेरि पाँच दिन रविसहित तीनै जनालाई हिरासतमा राखेर अनुसन्धान गर्न अनुमति दिएपछि प्रदर्शनकारीले निषेधित क्षेत्र तोडेका थिए । निषेधित क्षेत्र तोड्ने क्रममा प्रहरीमाथि आक्रमण गर्ने ६ प्रदर्शनकारीलाई प्रहरीले नियन्त्रणमा लिएको छ ।

यसअघि १८ जनालाई प्रहरीले नियन्त्रणमा लिएको थियो । त्यस मध्ये चार जना मंगलबार धरौटीमा रिहा भए । चार जनालाई प्रहरीले पाँच सय धरौटीमा १ भदौमै रिहा गरिसकेका थिए । तर, बाँकी १० जनालाई भने मुद्दा चलाउने तयारी भइरहेको छ ।