फ्रान्समा प्रदर्शन हिंसात्मक बन्दैः घटेन पेट्रोलको मुल्य

फ्रान्स, १६ मंसिर । फ्रान्समा पेट्रोलियम पदार्थको मुल्यबृद्धिपछि चर्किएको प्रदर्शन हिंसात्मक बन्दै गएको छ । पेरिसमा प्रहरी र प्रदर्शनकारीबीच झडप हुँदा १७ जना सुरक्षाकर्मीसहित कम्तिमा १ सय १० जना घाइते भएका छन् ।

प्रहरीले २ सय ७० जना प्रदर्शनकारीलाई पक्राउ गरेको छ । फ्रान्समा डिजेलको मुल्य पछिल्लो १२ महिनामा २३ प्रतिशतले बृद्धि भएको छ । अन्तराष्ट्रिय बजारमा इन्धनको मुल्य उतारचढाप भइरहँदा पनि फ्रान्समा भने लगातार मुल्य बृद्धि भइरहेको भन्दै प्रर्दशन गरिएको हो ।

राष्ट्रपति इमान्यूयल म्याक्रोनले हाइड्रोकार्बनमा कर बढाएपछि पेट्रोलियम पदार्थको मूल्य वृद्धि भएको हो । राष्ट्रपति म्याक्रोनले भने पेरिसमा भएको प्रदर्शन अनुचित भएको बताएका छन् ।

मूल्यवृद्धिको विरोधमा यस अघि गत नोभेम्बर १७ मा देशभर प्रदर्शन भएको थियो । प्रदर्शन चर्किंदै गएपछि सामाजिक सञ्जालहरुमा राष्ट्रपति म्याक्रोनको आर्थिक नीतिको आलोचना बढ्दै जाँदा प्रदर्शन पनि तिव्र बन्दै गएको छ ।