मन्त्री रघुवीर सम्पत्तिमा पनि साँच्चिकै “महासेठ”-४० करोड सेयर, डेढ सय बिघा जमिन

काठमाडौं, १० जेठ- सरकारले हिजो बुधबार मात्रै सार्वजनिक गरेको मन्त्रीहरुको सम्पत्ति विवरण अनुसार मन्त्री रघुवीर महासेठ सम्पत्तिमा पनि साँच्चिकै “महासेठ” नै देखिएका छन् । मन्त्रीमध्ये सबैभन्दा धेरै सम्पत्ति उनको देखिएको छ । भौतिक योजना तथा यातायातमन्त्री महासेठसँग विभिन्न ठाउँमा ४० करोडको मात्रै सेयर छ । डेढ सय बिघा जमिन रहेको छ ।

उनकी श्रीमती जुली महतोको नामबाट विभिन्न संघसंस्थामा करिब ४० करोड सेयर लगानी गरेका हुन् । उनको जग्गामध्ये ललितपुरको भैँसेपाटीमा ५८ सय वर्गफिट जग्गामा साढे २ तलाको घर छ ।

त्यसैगरी धनुषामा ६५ सय वर्गफिट, धनुषामै अर्को ८ बिघा र सिन्धुलीको कमलामाईमा ५ कट्ठा जग्गा छ । ललितपुरको नख्खुमा २ रोपनी १३ आना, ललितपुरकै धोबीघाटमा एक रोपनी ७ आना, जनकपुर उपमहानगरपालिकामा ९ कट्ठा जग्गा रहेको सम्पत्ति विवरणमा उल्लेख छ ।
धनुषा दिगम्बरपुरमा सगोलमा ९६ बिघा, धनुषाकै पटेरबामा ३९ बिघा र अर्को १० बिघा १० कट्ठा जग्गा छ । श्रीमतीकै नाममा धनुषाको जनकपुरमा साढे २ तलाको पक्की घर छ । उनले २६ तोला सुन पैतृक र २५ तोला सुन दाइजोबाट प्राप्त भएको देखाएका छन् ।

महासेठसँग साढे एक केजी चाँदी छ र अन्य विभिन्न महँगा गहना रहेको खुलाएका छन् । बैंकबाट लिएको २३ करोड ऋणसमेत देखाएका छन् । मन्त्री महासेठले ७२ लाख नगद रहेको विवरण पनि बुझाएका छन् ।