‘मेयर कप सप्तरी प्रिमियर लिग टी ट्वाइन्टी’ क्रिकेट प्रतियोगिता असार २८ बाट

सप्तरी, २६ असार। सप्तरीमा पहिलो पटक ‘मेयर कप सप्तरी प्रिमियर लिग टी ट्वाइन्टी’ क्रिकेट प्रतियोगिता शुरु हुने भएको छ ।

सप्तरी क्रिकेट संघको आयोजना तथा राजविराज नगरपालिकाको सहयोगमा मेयर कप सप्तरी प्रिमियर लिग टी २० क्रिकेट प्रतियोगिता सप्तरीको सदरमुकाम राजबिराजमा यहि असार २८ गतेदेखि सुरु हुने एक कार्यक्रममा जनाईएको छ ।

सप्तरीको इतिहासमै पहिलो पटक संघले विभिन्न खेलाडीहरुलाई खरीद गरी प्रतियोगिता सुरुवात गर्न लागिएको हो । उक्त खेलको लागि सोमबार तिन टिम ‘अक्सन’ मेथडवाट छनौट गरिएको छ । जस अन्तर्गत बोदेबर्साईन थन्डर्स, बजाज खडक वारिर्यस र तिलाठी कोईलाडी हिरोजगरि ३ टिमको सहभागिता रहने छ ।

उक्त टिमका मालिकमा थन्डर्सका आतेश सिंह यादव , वारियर्सका अनवर अली र हिरोजका सतिश सिंह रहेका छन् । राष्ट्रिय क्रिकेट टिममा समेत खेली सकेका मेहबुब आलमलाई तिलाठि कोईलाडी हिरोजले खरिद गरेको छ भने सिद्धान्त लोहनीलाई बोदे बर्र्साइन थन्डर्स र हासिम अन्सारीलाई बजाज खडक वारियर्सले खरिद गरेको संघका सचिव आयुष श्रेष्ठले बताए।

खेलाडी खरीद “अक्सन” प्रक्रिया अन्तरगत ए, बी, सी र डी गरि चार समूहमा बिभाजन गरियो । पहिलो ‘ए’ समुहको खेलाडीहरु दाम ५ देखी १२ हजार ५०० , समूह “बी” मा पर्ने खेलाडीहरु को मुल्य  ३ देखी ७ हजार ५०० , समूह “सी” का खेलाडीहरुको मुल्य १ हजार ५०० देखी ५ हजारसम्म र समूह “डी” मा पर्ने खेलाडीहरुको मुल्य १ हजारदेखी २ हजार ५ सयसम्म तोकिएको थियो ।

प्रतियोगितामा सहभागी ३ वटा टिमले एक आपसमा २/२ खेल गरि जम्मा ६ खेल खेल्ने तथा उत्कृष्ट अंकको अधारमा दुई वटा खेल गराइ फाइनल खेल खेलाइने आयोजक समुहले बताउनु भयो ।