मोटरसाइकलमा पनि इम्बोस्ड नम्बर प्लेट

काठमाडौं, माघ २८ । फागुनदेखि दुई पांग्रे सवारी साधानमा पनि इम्बोस्ड नम्बर प्लेट जडान सरु हुने भएको छ ।

यातायात व्यवस्था कार्यालय, बागमतिमा दर्ता भएका सरकारी, संस्थान र निजी दुई पांग्रे सवारीले इम्बोस्ड नम्बर प्लेट जडानका लागि आवेदन दिन सक्ने यातायात व्यवस्था विभागले जनाएको छ ।

नम्बर प्लेट जडानको लागि सवारी धनीले www.dotm.gov.np OR www.hsenp.dotm.gov.np लिङ्कमा गई तोकिएको आफ्नो सम्पूर्ण विवरण भरी अनलाइन निवेदन दिनु पर्नेछ । इम्बोस्ड नम्बर प्लेट प्राप्त गर्न सवारीधनीले आफ्ना सवारी साधनको हालसम्मको राजश्व चुक्ता गरेको हुनुपर्ने छ ।

इम्बोस्ड नम्बर प्लेट जडान वापतको दस्तुर २ हजार ५ सय तोकिएको छ । मातातीर्थस्थित यातायात व्यवस्था कार्यालयको आर्थिक प्रशासन शाखा वा सो कार्यालयले तोकेको बैंकमा यो रकम जम्मा गर्नुपर्नेछ ।

राजश्व फरफारक नगरी इम्बोस्ड नम्बर प्लेटका लागि मात्र रकम जम्मा गरेमा प्लेट उपलब्ध नगराइने र यसमा सवारीधनी नै जिम्मेवार हुने विभागले जनाएको छ।