यसकारण बन्द भए भद्रगोल,जिरे खुर्सानी र मेरी बास्सै

काठमाडाै, १६ साउन । नेपाल टेलिभिजनबाट हरेक रात ८ बजेको समाचारपछि प्रशारण हुने गरेका मनोरञ्जनात्मक टेलिसिरियलहरु केही हप्तादेखि दर्शकले हेर्न पाएका छैनन् । कार्यक्रम उत्पादक मिडिया हबको नेपाल टेलिभिजनसँग सम्झौता अवधि सकिएकाले ती सबै सिरियल बन्द भएका हुन् ।
मिडिया हबले हास्य टेलिश्रृंखला भद्रगोल (शुक्रबार), जिरे खुर्सानी (बिहिबार) मेरी बास्सै (मंगलबार) र ब्रेक फेल (सोमबार) तथा पारिवारिक टेलिश्रृंखला परिचय (आइतबार) उत्पादन गरेर प्रशारण गर्दै आएको थियो ।

ती सिरियल प्रशारणका लागि नेपाल टेलिभिजनसँग तीन वर्षका लागि गरेको सम्झौता एक्सपायर्ड भएको मिडिया हबका सञ्चालक सोम धितालले बताए । राति साढे आठ बजेदेखि ४० मिनेट ती सिरियल प्रशारण हुन्थे । टेलिभिजनका लागि ‘पिक’ मानिने यो समयमा अहिले एनटीभीले ‘फिलर’ हालिरहेको छ । यो समय खरिद गर्नका लागि एनटीभीले हालै नयाँ टेन्डर आह्वान गरेको छ । मिडिया हब फेरि पनि उक्त समय खरिद गर्न तयार छ, तर मूल्य घटाउनुपर्ने उसको शर्त छ ।
‘पहिलेको मूल्यमा हामीले धान्न सकेनौं, त्यसैले मूल्य घटाएर फेरी टेन्डर निकाल्न आग्रह गरेका छौं,’ धितालले अनलाइनखबरसँग भने । मिडिया हबले १९ वर्षदेखि एनटिभीसँग समय किनेर सिरियल प्रशारण गर्न थालेको हो ।