राजेन्द्र लिङ्देनलाई धम्की प्रकरणबारे छानविन गर्न सरकारसँग राप्रपाको माग

चैत २६, काठमाण्डौ । राप्रपाका महामन्त्री एवं संघीय संसदका सांसद राजेन्द्र लिङ्देनलाई अमुक व्यक्ति वा समुहबाट रकम लिइसकेको बताउँदै ज्यान मार्ने धम्की दिएको घटनालाई राप्रपाले गम्भीरतापूर्वक लिएको जनाएको छ ।

आपराधिक कार्यमा संलग्नहरुले योजनाबद्ध ढंगबाट श्रृङखलागत रुपले सतर्कतापूर्वक धम्की दिइरहेको भन्दै राप्रपाले पैसासंग मात्रै सम्बन्धित नरहेर राजनीतिक वा अन्य कारण पनि हुन सक्ने आशंका व्यक्त गरेको छ ।

एक प्रेस विज्ञप्ति जारी गर्दै राप्रपा प्रचार विभाग प्रमुख मोहन श्रेष्ठले सार्वजनिक गरेको विज्ञप्तिमा घटनाको मिहिन ढंगबाट छानबिन गरि पक्राउ परेका व्यक्तिबाट सत्यको उजागर गर्न सरकारसमक्ष माग गरेको छ ।

राप्रपाले विज्ञप्तिमा उल्लेख गरेको छ,–वास्तविक दोषी पत्ता लगाउन घटनाको जरासम्मै पुगेर अनुसन्धान गर्ने कार्यलाई निरन्तरता दिन र दोषीलाई कडा भन्दा कडा कारबाही गर्न नेपाल सरकार र सम्माननीय प्रधानमन्त्रीसंग राप्रपा जोडदार माग गर्दछ ।

केही दिन अघि फोन र एसएमएसमार्फत् लिङ्देनसँग रकम माग गरिएको थियो । रकम नदिए उनलाई घरबाट बाहिर निस्किनासाथ मार्ने धम्की दिइएको थियो । प्रहरीले धम्क्याउने तिलकदाश पराजुलीलाई पक्राउ गरिसकेको छ। प्रहरीले अभियुक्तलाई नियन्त्रणमा लिएपछिमात्रै लिङ्देनले धम्की आएको सार्वजनिक गरेका थिए ।