हाँस्य कलाकार राष्ट्रपतिमा : भारी मतले जिते

एजेन्सी । युक्रेनमा भएको चुनावबाट राष्ट्रपतिका लागि हास्यकलाकार भोलोदिमर जेलेन्स्की विजयी भएका छन् । युक्रेनमा आइतबार मतदानमा भएपछि वर्तमान राष्ट्रपति पेट्रो पोरोसेन्कोलाई ठूलो मतान्तरले पराजित गरेका छन् ।

खासै राजनीतिमा अनुभव नभएका ४१ वर्षीय जेलेन्स्कीले ७३।२ प्रतिशत मत प्राप्त गरी जितेका हुन् । युक्रेनको निर्वाचन आयोगका अनुसार पोरोसेन्कोले २४ दशमलव ४ प्रतिशत मात्र मत प्राप्त गरेका छन् ।

चुनावमा राष्ट्रपति पोरोसेन्को र हास्यकलाकार भोलोदिमर जेलेन्स्कीबीच कडा प्रतिस्पर्धा हुने पछिल्ला जनमत सर्वेक्षणले देखाएका थिए । पहिलो चरणमा कुनै पनि उम्मेदवारले पूर्ण बहुमत नल्याएकाले आइतबार दोस्रो चरणमा राष्ट्रपतिको मतदान भएको थियो ।

पराजित राष्ट्रपति पोरोसेन्कोले आफ्नो हार भएको स्विकार्दै विजयी जेलेन्स्कीलाई बधाई दिएका छन् । सन् २०१४ देखि सत्तामा रहेका पोरोसेन्कोले ‘अप्रत्यासित’ निर्वाचन परिणामले देशलाई अनिश्चित दिशातर्फ लैजाने दाबी गरे ।