वकीलहरुको चुनाव : कहिले प्रगतिशील अघि कहिले लोकतान्त्रिक कसले जित्ला ?

काठमाडौँ । कानुन व्यवसायीको छाता संगठन नेपाल बार एशोसिएसनको नयाँ नेतृत्वका लागि भएको निर्वाचनको मतगणनामा प्रगतिशील समुहले अग्रता पाएको छ ।

अध्यक्षका उम्मेदवार चण्डेश्वर श्रेष्ठले फेरि अग्रता लिएका छन् । काठमाडौं उपत्यकाको मतगणनासँगै श्रेष्ठ अगाडि देखिएका हुन् । बुधबार दिनभर लोकतान्त्रिकका अध्यक्ष पदका उम्मेदवार सुनिल पोखरेल अगाडि थिए ।

बुधबारको बेलुकीको पछिल्लो परिणाम अनुसार प्रगतिशील समूहका श्रेष्ठले २४ सय ४५ मत प्राप्त गरेका छन् । प्रतिद्वन्द्वी पोखरेलले २३ सय ७५ मत ल्याएका छन्। उपाध्यक्षहरुमा पनि प्रगतिशील समूहले अग्रता लिइरहेको छ ।

महासचिवमा भने लोकतान्त्रिकका लीलामणि पौडेल अघि देखिएका छन्। पौडेलले २४ सय ५४ मत ल्याउँदा निकटतम् प्रतिस्पर्धी सुरेन्द्रबहादुर थापाले २३ सय १४ मत पाएका प्रमुख निर्वाचन अधिकृत दामोदर खड्काले बताए ।