विमाको २५ लाख रुपैयाँका लागि रौतहटमा छोरीको हत्या

विमा वापत पाउने २५ लाख रुपैयाँको लोभमा एक जना बाबुले आफ्नै छोरीको हत्या गरेका छन् । रौतहटको मौलापुर नगरपालिका–६ पथराबुधरामका ३९ वर्षीय रामकिशोर यादवले विमाको रकमको लोभमा ५ वर्षीया छोरी लक्ष्मी राय यादवको घाँटी थिचि हत्या गरेर पोखरीमा फालेको अवस्थामा शव फला परेको प्रहरीले जनाएको छ ।

जिल्ला प्रहरी कार्यालय रौतहटले शुक्रबार पत्रकार सम्मेलन गर्दै आरोपी यादवलाई सार्वजनिक गरेको छ । रौतहट प्रहरीका डिएसपी तथा प्रवक्ता नवीन कार्कीले बिमाको रकम हातपार्नका लागि यादवले छोरीको निर्ममतापूर्वक हत्या गरेको बताए । हत्याको भोलिपल्ट पोखरीमा ५ वर्षीया लक्ष्मीको शव फेला परेपछि प्रहरीले शुक्ष अनुसन्धान गरेको थियो ।

लक्ष्मी रामकिशोरकी कान्छी छोरी हुन् । उनले छोरीको सुरक्षित भविष्यका लागि केही दिन अघि विमा गराएका थिए । रौतहटको गरुडामा रहेको प्रभु बैंकमा रामकिशोरले कान्छी छोरी लक्ष्मीको २५ लाख रकमको विमा गराएका थिए । बिमाबापतको पहिलो किस्ता करिब पौने २ लाख उनले बैंकलाई बुझाएका पनि थिए ।

तर कसैले बिमा गरेको एक महिनामै यदी बिमकको निधन भएका दुई गुणा पैसा फिर्ता पाइन्छ भन्ने सुनाए पछि यादवमा छोटो समयमा नै धेरै पैसा कमाउने लोभ जागेको अनुसन्धानमा संलग्न प्रहरी अधिकारी बताउँछन् । रामकिरोशले पैसाको लोभमा विमा गराएको २९ औं दिनमा छोरीको हत्या गरेका थिए ।

आर्थिक अवस्था कमजोर भएको हुँदा पैसा कमाउने दाउमा रामकिशोरले चार वर्षीया छोरीको हत्या गरेको अनुसन्धानबाट खुलेको प्रहरीले जनाएको छ । उनले छोरीलाई घरमै कुटपिट गरी हत्या गरेको र हत्यापछि शव पोखरीमा फालेर आफैं छोरी हराएको भन्दै प्रहरीलाई खबर गर्न पुगेको डीएसपी कार्कीले बताए ।

नियन्त्रणमा लिएको यादवलाई जिल्ला प्रहरी कार्यालय रौतहटबाट मुलुकी अपराधसंहिता २०७४ को ज्यानसम्बन्धी कसुर अन्तर्गत मुद्दा दर्ता गरेर जिल्ला अदालत रौतहटबाट ५ दिनको म्याद थप गरेर अनुसन्धान कार्यअगाडि बढाइएको प्रवक्ता कार्कीले जानकारी दिए । पछिल्लो समय सामाजिक विचचनका यस्ता घटनामा निकै बृद्धि भइरहेको छ ।