संखुवासभा हत्या प्रकरणः आफन्तबाटै हत्या

१३ दिने परिवारभित्रका काका तेजबहादुर कार्कीसँगको रिसले लोकबहादुर कार्कीले परिवारका ६ जनाको हत्या गरेको खुलेको छ । प्रहरीसँगको बयानमा २६ वर्षीय लोकबहादुर कार्कीले आफूलाई जहिल्यै हेप्ने गरेकाले आवेगमा तेजबहादुरको हत्या गरेको भनेका छन् ।

तेजबहादुरकी पत्नी कमला कार्की र बुहारी रञ्जना कार्कीले हत्या गरेको देखेपछि दौडदै आएको र उनीहरुको पनि हत्या गरेका बयान दिएका छन् । दुवैलाई ह्यामरले हिर्काएका थिए । यो दृश्य ८ वर्षीय विपिन कार्की र ५ वर्षीया गोमा कार्कीले पनि देखेपछि उनीहरुको पनि हत्या गरेका थिए ।

हत्या गर्न खोज्दा विपिन र गोमा भागेका थिए । उनीहरुको लखेटेर हत्या गरेको बयान लोकबहादुरले दिएको प्रहरीले जानकारी दिएको छ । त्यसपछि घरमा बसेकी ८४ वर्षीया पार्वती कार्कीको पनि हत्या गरेका थिए । बुद्धमान कार्की कान नसुन्ने भएकाले केही थाहानपाएकाले छाडिदिएका थिए ।

लोकबहादुरले तेजबहादुरमाथि आफ्नी आमाको हत्या गरेको आशंका समेत गरेका थिए । तेजबहादुरकै घरमा उनकी आमा लडेको कारण आशंका गरेका थिए । पछि उपचारका क्रममा आमाको मृत्यु भएको थियो ।

प्रहरीले अनुसन्धानका क्रममा तेजबहादुरको घरमा रगत लागेको सर्ट र हत्यामा प्रयोग भएको ह्यामर फेला परेको थियो । सबै प्रमाण संकलन गरेपछि तेजबहादुरलाई प्रहरीले नियन्त्रणमा लिएको हो । मानसिक रोगी भएको भनिएका लोकबहादुरले औषधी सेवन गर्दै आएको खुलेको छ ।

संखुवासभाको मादी नगरपालिकास्थित उम्लिङमा २१ भाद्रमा एकै परिवारका छजनाको हत्या भएको थियो । घरमूली ९० वर्षीय वृद्ध बौद्धमान कार्की मात्र जिवित भेटिएका थिए । बौद्धमानकी ८४ वर्षीया पत्नी पार्वती कार्की, ५२ वर्षका छोरा तेजबहादुर कार्की, बुहारी ५२ वर्षीया कमला कार्की, नातिनी बुहारी ३२ वर्षीया रञ्जना कार्की, पनाति वर्ष ८ का विपिन कार्की र पनातिनी वर्ष ५ की गोमा कार्की मृत फेला परेका थिए ।

पार्वतीको शव घरमा नै फेला परेको थियो । तेजबहादुरको शव रोडको भित्तामा, कमला र रञ्जनाको शव खोलामा भेटिएको थियो । विपिन र गोमाको शव एक किलोमिटर टाढा बारीमा मृत फेला परेको थियो ।