सरकारप्रति राप्रपा आक्रामक, देशभर भण्डाफोर गर्ने

काठमाडौं। राष्ट्रिय प्रजातन्त्र पार्टी (राप्रपा) ले कांग्रेस–एमाले गठबन्धन सरकारकै कारण भ्रष्टाचार संस्थागत हुँदै गएको निश्कर्ष निकालेको छ।

मंगलबार पार्टी केन्द्रीय कार्यालयमा बसेको राप्रपाको कार्यसम्पादन समितिको बैठकले वर्तमान सरकारको कारण देशमा भ्रष्टाचार संस्थागत हुँदै गएको निश्कर्ष निकालेको हो।

राप्रपाले सरकारको कारण मुलुक अस्तव्यस्त हुँदै गएको समेत निश्कर्ष निकालेको छ। राप्रपाले सरकारविरुद्ध देशैभर भ्रण्डाफोर र विरोध कार्यक्रम गर्ने निर्णयसमेत गरेको छ ।

सरकारले अर्थतन्त्र चलायमान बनाउन नसकेको, अन्तर्राष्ट्रिय सम्बन्धलाई अन्तुलित राख्न नसकेको, देश भुूराजनीतिक चक्रव्यूमा फस्ने खतरा बढेको राप्रपाको निश्कर्ष छ । कांग्रेस–एमालेसहितको दुई तिहाइ बहुमतको नजिकको सरकारले देश र जनताको पक्षमा काम गर्न नसकेको भन्दै सर्वत्र आलोचना भइरहेको अवस्थामा राप्रपाले भण्डाफोर गर्ने निर्णय लिएको हो ।

त्यस्तै, सहकारी पीडितको समस्या समाधानतर्फ पनि सरकारले ध्यान नदिएको राप्रपाको निश्कर्ष छ।