साँझ नपर्दै यौनकर्मी खोज्नेको भिड, यसरी हुन्छ रत्नपार्कमा देहव्यापार
सारांश
- राजधानी काठमाडौँको केन्द्रमा रहेको स्थान हो ‘रत्नपार्क’ ।
- देशमा गणतन्त्र स्थापना भएसँगै यो स्थानको नाम परिवर्तन भएर रत्नपार्कबाट शंखध्वर उद्यान भइसकेको छ ।
- तर अझै पनि आम मानिस यसलाई रत्तपार्ककै नामले चिन्छन् ।
राजधानी काठमाडौँको केन्द्रमा रहेको स्थान हो ‘रत्नपार्क’ । देशमा गणतन्त्र स्थापना भएसँगै यो स्थानको नाम परिवर्तन भएर रत्नपार्कबाट शंखध्वर उद्यान भइसकेको छ । तर अझै पनि आम मानिस यसलाई रत्तपार्ककै नामले चिन्छन् । रत्नपार्क धेरै कारणले चर्चित अनि बदनाम छ । बेरोजगारहरुको समय कटाउने स्थान, साना तथा खुद्रा व्यापारीको व्यापार गर्ने थलो र यौनकर्मीहरुको अखडा पनि हो रत्नपार्क ।
यौनकर्मीको अखडाको रुपमा रत्नपार्कले बदनामी कमाएको निकै लामो समय भइसक्यो । सुधारका लागि थुप्रै प्रयास भएपनि यो समस्या अलिकति पनि कम भएको छैन । यो स्थानले यति धेरै बदनामी कमाएको छ कि कोही राम्रै उद्देश्यले त्यहाँ पुगे पनि अरुले हेर्ने नजर भने फरक हुन सक्छ । यदी साँझ तिर रत्नपार्कको आसपासमा अफिस सकिएर घर फर्कन गाडी कुरेर बसिरहेकी युवती भेटिए, ती युवतीले त्यहाँ कस्तो व्यवहारको सामना गर्नुपर्छ त्यसको अनुभव त्यहाँ पुग्ने जोकोहीले गरेको हुन्छ । कोही युवती देखिनै हुँदैन जाने हो भन्दै पछि लाग्नेको भिड नै जम्मा हुन्छ ।
यस्तै समस्या भोग्नेमध्येकी एक हुन् काभ्रेकी २१ वर्षीय बन्दना कार्की । असनस्थित एक सहकारीमा काम गर्ने उनी बानेश्वर जाने गाडी कुर्न हरेक साँझ रत्नपार्कमा उभिने गर्छिन् । साँझको समय पिक आवर भएका कारण बानेश्वरतर्फ जाने माइक्रो वा ट्याम्पुमा निकै हुल हुने भएकाले गाडी चढ्न उनले हरेक साँझ कम्ति १५ देखि ३० मिनेटसम्म उभिएरै बिताउनु पर्ने हुन्छ । बन्दनालाई गाडी कुर्दाको यो क्षण सबैभन्दा दिक्कलाग्दो हुन्छ । यौनकर्मी ठानेर उनलाई छेडछाड गर्ने र जाने हो भन्दै नजिक आउनेहरुले दिक्कै बनाउँछन् । विगत ३ वर्षदेखि यो समस्या एकनासले झेल्दै आएकी उनी रत्नपार्कको तनावबाट मुक्त हुन जमलबाट अन्य स्थानतिर जागिर खोज्ने तयारी गरिरहेको बताउँछिन् ।
यता, सुदुरपश्चिम कैलालीका रतन विश्वकर्माको दिनचर्या भने रत्नपार्कसँगै जोडिएको छ भन्दा फरक हुन्न । ठमेलको एक दोहोरीमा सेक्युरिटीको काम गर्ने उनी यौनकर्मी खोज्दै उनी हरेक साँझ रत्नपार्क पुग्छन् । दोहोरीमा आउने ग्राहकहरुबाट पाउने टिप्सबाट उनी रत्नपार्कका लागि खर्च जुटाउँछन् । उनी भन्छन् ‘दाई यता आउने लत नै लागिसक्यो, एक दिन नगए के नपुगे के नपुगे जस्तो हुन्छ ।’
स्याङ्जाका सुमन ढुंगाना रत्नपार्कमा भेटिने गजबका पात्र हुन् । उनको रोजीरोटी नै रत्नपार्कबाट चलेको छ । सुरुसुरुमा जवानीको जोश सेलाउने उद्देश्यले उनी रत्नपार्क जान गर्थे । तर विस्तारै उनले रत्नपार्कलाई कर्मथलो बनाए । अहिले उनी रत्नपार्कमा भेटिने यौनकर्मी र ग्राहकबीचको सेटिङ मास्टर बनेका छन् । उनी भाइबरबाट ग्राहकको सम्पर्कमा पुगी उनीहरुलाई यौनकर्मी मिलाइ दिन्छन् अनि कमिशन लिन्छन् । मासिक १ लाख रुपैयाँ भन्दा बढि उनी सेटिङमार्फत कमाइरहेका छन् ।
तेस्रो लिंगीको पनि अखडा हो रत्नपार्क । ठमेलमा केही कडाइ भए पछि अहिले धेरै जसो तेस्रो लिंगीहरु बस्ने र ग्राहक खोज्ने स्थान रत्नपार्क बनेको छ । तेस्रो लिंगीहरु रत्नपार्कका अनेक उपाय लगाउँदै ग्राहक तान्ने प्रयास गरिरहेका हुन्छन् रत्नपार्कमा । रत्नपार्कमा भेटिने अधिकांस तेस्रो लिंगीहरुले ग्राहकसँग कुरा मिलेपछि लाजिम्पाटमा रहेको आफ्नो फ्ल्याट लाने गरेका छन् । तर तेस्रो लिंगीको पछि लागेर जाने कतिपय लुटिने पनि गरेका छन् ।
प्रतिक्रिया