साथी गएका व्यक्ति कसरी एमआरआई गर्दा मारिए ?

अस्पतालको ‘एमआरआई’ कक्षभित्र आफन्तलाई लिएर गएका एक ३२ वर्षीय युवकलाई मेशिनले तानेपछि मृत्यु भएको भारतीय संचार माध्यमले बताएका छन् । भारतको मुम्बइमा राजेश मारु नामका यी युवक एक वृद्ध आफन्तको उपचारका लागि अस्पताल आएको बताइएको छ । तिनै वृद्धलाई ‘एमआरआई’ स्क्यान गराउन कोठाभित्र लैजानेक्रममा सो दुर्घटना भएको हो । अस्पतालमै काम गर्ने वार्डका कर्मचारी भित्तल चवनले उनलाई कोठा भित्र छिर्नुअघि एउटा अक्सिजनको सिलिन्डर बोक्न दिएका कारण यस्तो भएको बताइएको छ ।

सिलिन्डर लिएर भित्र जाँदा मेशिन खुल्लै रहेकाले उनको हातको फलामलाई मेशिनको शक्तिले तानेपछि यो दुर्घटना भएको पुलिसले बताएका हुन् । राजेशले फलामलाई भित्र लानु खतरनाक हुन्छ भनेर बताउँदा पनि वार्डका कर्मचारी चवनले, ‘मेशिन बन्द छ केही पनि हुँदैन यो मेरो दैनिकको काम हो’ भन्दै उनलाई फलामको अक्सिजन सिलिन्डर भित्र लैजान लगाएको राजेशसँगै रहेका उनका आफन्तले बताएका हुन् । तर भित्र पुग्दा अचानक ‘एमआरआई’ मेशिनबाट आएको अत्यन्तै बलियो फोर्सले राजेशको हात तानेपछि केही समय उनी त्यसमै अड्कीएका थिए ।

त्यसै समय उनको हातमा रहेको अक्सिन सिलिन्डर फुटेर ग्यास बाहिर निस्किएको अस्पतालका अधिकारीले बताए । सँगैका आफन्त र अस्पतालका कर्मचारीले उनको हातलाई निकाल्न धेरै जोडले प्रयास गरेपछि मात्र मेशिनबाट हात बाहिर आयो तर त्यतिबेला सम्म चोटका कारण उनको शरीर सुन्निएर धेरै रगत बगिसकेको थियो । त्यसलगत्तै उपचारका लागि उनलाई आपतकालिन वार्डमा लैजाँदा दुई मिनेटभित्रै उनको ज्यान गएको आफन्त हरिस सोलान्कीले बताए ।