साधुसन्तहरुलाई न्यानो बाँड्दै जयसवाल परिवार

कपिलवस्तु, ५ माघ । कपिलवस्तु शिवराज नगरपालिका चन्द्रौटा निवासी सानेमती जयसवालको परिवारले हरेक बर्ष जस्तै यस बर्ष पनि यस क्षेत्रका साधुसन्तहरुलाई कम्बल वितरण गरेको छ । श्रीमान स्व. राजाराम जयसवालको पुण्यतिथि पारेर जयसवाल परिवारले ९० वटा कम्बल साधुसन्तहरुलाई कर्णेश्वर मन्दिरमा वितरण गरेको हो ।

बढ्दो चिसोमा साधुसन्तलाई कम्बल बाँडेपछि पुण्य प्राप्तिसँगै बुबाको आत्माले समेत शान्ति पाउने भन्दै कम्बल वितरण गरिएको स्व. राजाराम जयसवालका छोरा विजय जयसवालले बताए । “हरेक बर्ष बुबाको बार्षिक पुण्यतिथिमा कर्णेश्वरी मन्दिरमा बुबाको नामबाट नै साधुसन्तहरुलाई कम्बल वितरण गर्दै आएका छौं । चिसो मौषममा कम्बल पाएका सन्तहरुको आशीर्वाद पनि लाग्ने हुनाले कम्बल वितरण गरेका हौं”, छोरा सुरेश जयवालले भने । स्व. जयसवालका सुभाष, सुरेन्द्र, विजय, सुरेश र महेश गरी पाँच छोरा रहेका छन् ।

साधुसन्तहरु हाम्रो देशको पहिचान हुन् भन्दै जयसवाल परिवारले हरेक बर्ष यसरी नै साधुसन्तलाई कम्बल वितरण गर्दै आएको छ । यस्तो पुनित कार्यमा आफूलाई पनि सहभागी भई पुण्य प्राप्त गर्ने अवसर जुटेको कपिलवस्तु क्षेत्र नं. ३ प्रतिनिधि सभा सदस्य अभिशेष प्रताप शाहले कम्बल वितरण कार्यक्रममा बताए ।

कार्यक्रममा इलाका प्रशासन कार्यालयका कार्यालय प्रमुख जगदीश अर्यालले साधुसन्त हाम्रो धर्म र संस्कृतिका संवाहक भएको औंल्याउँदै धर्मका नाममा गरिने अनेक तडकभडक भन्दा यस्ता साधुसन्तको सम्मानसहित उनीहरुलाई कम्बल वितरण गर्नु पुनित र सराहनीय कार्य भएको बताए । कर्णेश्वरी मन्दिरमा जम्मा भएका ९० जना साधुसाधवीहरुलाई प्रतिव्यक्ति १ कम्बल वितरण गरिएको हो । कार्यक्रममा समाजसेवी अजय थापा, प्रेम बहादुर रायमाझी, हरि पोखरेल लगायत स्थानीयको उपस्थिति थियो ।