सिनो बहिस्कार आन्दोलनका अगुवा रामको निधन

काठमाडौं । दलित एवं भूमिअधिकार आन्दोलनका अगुवा बलदेव रामको मंगलबार ७४ वर्षको उमेरमा निधन भएको छ ।

विं.सं.२००० सालमा सप्तरी जिल्ला मधुपट्टीमा जन्मिएका राम लामो समयदेखि दलित अधिकारको पक्षमा संघर्षरत थिए । मोही अधिकारको लागि संघर्ष गर्दै आएका उनी आफैं मोही थिए ।

उनले २०५६ साल असारमा सप्तरीको कञ्कपुरबाट उठेको सिनो बहिष्कार आन्दोलनको नेतृत्व गरेका थिए । बहुदल आएको १० वर्षपछि पनि सिरहा र सप्तरीका दलित भनिएको चमार जातिका मानिसहरुले गैरदलीतको घरको सिनो फाल्ने काम गर्नुपर्दथ्यो । यो आन्दोलन शुरु भएपछि गैर दलितहरुले चमार बस्तीमा नाकाबन्दी समेत गरेका थिए । यो आन्दोलनपछि चमार जातिले सिनो फाल्ने बाध्यता हटेको छ ।

२०६१ सालमा उनी राष्ट्रिय भूमिअधिकार मञ्चको संस्थापक अध्यक्ष भएर भूमिअधिकार आन्दोलनलाई देशव्यापी बनाउन अग्रणी भूमिका खेेलेका थिए ।

उनले दर्जन भन्दा बढि पुरस्कार पाएका छन् । उनी २०६५ सालमा गठित भूमि आयोगका सदस्य समेत भएका थिए । उनको श्रीमती, ३ छोरी र २ छोरा छन् ।