‘सी ओ डब्लु काउ’ मा रीमा विश्वकर्माको मादक नृत्य

नायिका केकी अधिकारीले निर्माण गरेको पहिलो चलचित्र ‘कोहलपुर एक्सप्रेस’को पहिलो गीत ‘सी ओ डब्लु काउ’ युट्युबमा रिलिज भएको २४ घन्टामै करिब साढे तीन लाखभन्दा बढीले हेरेका थिए ।

मोडलिङ, म्युजिक भिडियो हुँदै अभिनयमा लोकप्रियता कमाएर निर्माणमा हात हालेकी केकी पहिलो चलचित्रको पहिलो गीतमा पाएको प्रतिक्रियाबाट निकै उत्साहित छिन्। राजनराज शिवाकोटीको संगीत तथा राजनराज र लोकप्रिय गायिका मेलिना राईको आवाजमा रिमा विश्वकर्मा, केकी आफैँ, गम्भीर बिष्ट र विनोद न्यौपानेको अभिनय छ। गम्भीर ‘कोहलपुर एक्सप्रेस’का नृत्य निर्देशक पनि हुन्।

यो मेलोडियस गीतमा रिमा नृत्य र अभिनय दुवैमा जमेकी छन् । युट्युबमा यो गीत हेर्ने दर्शकले रिमालाई निकै मन पराएको प्रतिक्रिया दिएका छन् ।

तीनवटा गीतमात्र भएको ‘कोहलपुर एक्सप्रेस’का बाँकी दुई गीत अर्जुन पोखरेल र कालीप्रसाद बासकोटाले तयार पारेका हुन् । अहिलेका तीन चर्चित संगीतकर्मी कालीप्रसाद, राजन र अर्जुनबाट ‘कोहलपुर एक्सप्रेस’का तीन गीत कम्पोज गराएको केकीले जानकारी दिइन्।

नेपाली चलचित्र जगतमा मिलनसार र अध्ययनशील नायिकाको छवि बनाएकी केकीको फेसबुकको टाइमलाइन  यो गीत रिलिज भएयता उनलाई दिएका बधाई र शुभकामनाका स्टाटसले भरिएको छ। गीत रिलिज भएको २४ घन्टामै सयौँले फेसबुक, म्यासेज र फोनबाट चलचित्रका लागि आफूलाई शुभकामना दिएको केकीले जानकारी दिएकी छन् ।

केकीका अनुसार २०७५ वैशाखमा रिलिज हुन लागेको ‘कोहलपुर एक्सप्रेस’ अहिले सम्पादनका क्रममा छ। जुनकिरी आर्ट्स प्रोडक्सनको ब्यानरमा निर्माण हुँदै गरेको यो चलचित्र विशाल भण्डारीले निर्देशन गरेका हुन्।

हेर्नुहोस् गीत