सुनौला सपनासहित दुर्घटनामा घाइते, रकम अभावले दाङका यी युवाको मलेसियामा उपचार प्रभावित

उमेश बञ्जाडे

मलेसिया, १० साउन । घरपरिवारको आधार नै थला परेपछिको अवस्था सायद भोग्नेलाई मात्रै थाहा हुन्छ । धुरी खाँबो जीर्ण बन्दै जाँदा घरको छानो जोगाउने जिम्मेवारी बोकेको मान्छे अपत्यारिलो भुमरीमा परेपछि सम्भवतः पारिवारिक अवस्था झन विकराल बन्दै जान्छ नै ।

यस्तै पीडाले थलिएका छन् दाङ तुलसीपुरका एक युवा मलेसियामा । धन कमाउने आशा र सुनौला सपनासहित घरबाट परदेश पसेका उनी सडक दुर्घटनामा पर्दा पीडाले जेलिएका छन् । विगत ५ महिनादेखि पूर्ण उपचार गराउन नसक्दा अप्ठ्यारोमा परेका हुन् दाङको तुलसीपुर उपमहानगरपालिका १० का डम्बर बस्नेत ।

गत जनवरीमा सडक दुर्घटनामा परी गम्भीर घाइते भएका थिए उनी । कम्पनीको काम सकेर खाद्यान्न किनमेलका लागि बजार जाँदैगर्दा उनी दुर्घटनामा परेका हुन् । रोजगारीका लागि २०७२ साल असोजमा “मन ओभरसिज प्रालिबाट मलेसियाको टि.एस.के. मेसिनरी एण्ड इन्जिनियरिङ कम्पनीमा आएका बस्नेत अहिले आर्थिक अभावका कारण पूर्णरुपमा स्वस्थ हुन नसकेका हुन् ।

घाइते बस्नेतलाई सेलेङ्गोर जिल्लास्थित केलाङको स्थानीय अस्पतालले प्रारम्भिक उपचारपछि थप उपचारका लागि राजधानी क्वालालम्पुरको “सुंघाई बुलोन” अस्पतालमा रिफर गरेको थियो । टाउकोमा गम्भीर चोट लागेका बस्नेतलाई अस्पतालले डिस्चार्ज गरे पनि टाउकोमा रगत जमेको भन्दै अप्रेशन गरियो । चोट गहिरो रहेकाले उक्त भागलाई पुनः एकपटक टाँका खोलेर सफाइ गरेपछि मात्रै बिरामी यथास्थितिमा आउन सक्ने अस्पतालको सुझाव छ । बस्नेतले नेपाल गएरै उपचार गराउने चाहना व्यक्त गरेपनि टाउकोमा चोट पुगेको स्थानबाट एउटा “मांसपेशी” झिकेर त्यसको सफाई गर्नुपर्ने भन्दै अस्पतालले आइसियुमा राखेको छ । जसलाई पुरानै स्थानमा राख्न २६ हजार मलेसियन रिंगिट लाग्ने अस्पताल स्रोतले जनाएको छ ।

बिमा कम्पनीले उपचारका लागि १८ हजार मलेसियन रिंगिट उपलब्ध गराए पनि त्यो रकम यसअघिको उपचारमै सकिएको पीडित बस्नेतले बताएका छन् । अहिले अस्पताल बाहिरै भएपनि पैसाको अभावमा उपचार प्रभावित भएको पीडित बस्नेतले जनाएका छन् । दुर्घटना भएको ५ महिना बितिसक्दा पनि कतैबाट सहायता नपाएका उनले मिडियाहरुले आफ्नो समस्याका बारेमा जानकारी स्वरुप समाचार प्रसारण वा प्रकाशन गरिदिएमा सहयोग उठ्नसक्ने आशा व्यक्त गरेका छन् ।

यता यही अवस्थामा आर्थिक नजुटाई थप उपचार गर्न नसकिने अस्पताल स्रोतले जनाएको रोल्पा निवासी सुकुमार घर्तिले बताएका छन् । उनको अवस्था दैनिक असामान्य बन्दै गएका कारण सबैसँग सक्दो आर्थिक सहयोगको अपेक्षा गरिएको घर्तीको आशय थियो । पीडित बस्नेतले पनि छिटोभन्दा छिटो उपचार गराएर स्वदेश फर्किने सपना बुनेकाले सबैसँग सक्दो सहयोगको लागि अपिल गरेका छन् । ३० वर्षीय बस्नेतको परिवारमा आमाबुवा, छोरी र श्रीमती रहेका छन् ।

हाललाई सहयोग गर्न चाहनेले पीडित बस्नेतको नम्बर ं६०११५१२९३५१४ मा सम्पर्क गरेर सहयोग गर्न सक्ने बस्नेतले जनाएका छन् ।