सुन तस्करीबारे अनुसन्धान हुँदै गर्दा थप सुन तस्करीका दुई घटना

काठमाडौं, १९ असार । संगठित सुन तस्करीबारे विशेष समितिले गम्भीर अनुसन्धान गरिरहेका बेला सुन तस्करीका पछिल्ला दुई घटना सार्वजनिक गरिएका छन् । यी घटनाले प्रहरीलाई झस्काएको छ ।

महानगरीय प्रहरी वृत्त नागढुंगाले काठमाडौंबाट सुन लिएर महेन्द्रनगर हुँदै भारत जान लागेको भारतीय नम्बरको कारबाट १६ गते ३ किलो सुन बरामद गरेको थियो । अर्को दिन आइतबार रसुवाको केरुङ नाकाबाट मोटरसाइकलमा काठमाडौं छिर्दै गरेका तेन्जिङ तामाङलाई नागढुंगाबाटै प्रहरीले ६ किलो सुनसहित पक्राउ गरेको थियो ।

एक दिनको अन्तरमा भएका यी दुई घटनाले संगठित सुन तस्करीमाथि गम्भीर अनुसन्धान चलिरहे पनि तस्करी नरोकिएको पुष्टि गरेको छ । यी दुबै घटनामा तस्कर समूहले फरक शैली प्रयोग गरेको देखिन्छ ।

भारतीय चालक दीपककुमार मौर्यले चलाएको यूके ०२४६८४ नम्बरको कारको इन्जिनमाथि एअर फिल्टर बक्सभित्र लुकाएर राखेको ३ किलो सुनमा इमिरेटस गोल्ड लेखिएको छ । अर्थात यसअघिका ठूला तस्करीमा जस्तै उक्त सुन पनि दुबईबाट भित्रिएको थियो ।

त्यस्तै, १७ गते नागढुंगाबाट पक्राउ परेको ३ केजी सुन भने स्विट्जरल्यान्डको मेटालोर नामक कम्पनीमा बनेको देखिन्छ । कम्पनीको वेबसाइटका अनुसार सन् २००१ मा मेटालोर टेक्नोलोजिज नामक कम्पनीको नाम परिवर्तन गरेर मेटलोर ग्रुप कम्पनी बनाइएको हो भनेर आजको कान्तिपुर दैनिकले यो समाचार छापेको छ ।