सोलुखुम्बुमा वाम गठबन्धन बलियो

सोलुखुम्बु, कात्तिक ११ – सोलुखुम्बुमा नेपाली कांगे्रस भन्दा वाम गठबन्धन बलियो देखिएको छ । स्थानीय तहको चुनावको नतिजा केलाउने हो भने कुल ८ वटा स्थानीय तह रहेको सोलुखुम्बुमा वाम गठबन्धनमा आवद्ध दल ७ वटा स्थानीय तहमा विजयी भएका छन् ।

सोलुखुम्बुमा वाम गठबन्धनले २१ हजार ६ सय ९९ मत पाएको थियो भने नेपाली कांग्रेसले १२ हजार ७ सय १८ मत पाएको थियो । यस आधारमा यहाँ वाम गठबन्धनको मत कांग्रेसले पाएको भन्दा ८ हजार ९ सय ८१ भन्दा धेरै छ । सोलुखुम्बुको सोलुदूधकुण्ड नगरपालिकामा मात्रै नेपाली कांग्रेस २७५१ मत ल्याएर स्थानीय चुनावमा विजयी भएको थियो । दोश्रो रहेको एमालेको २६०५ मत थियो । नेकपा माओवादी केन्द्रले २ र नेकपा एमालेले ५ तह जितेका थिए ।

तर सबै तहमा दोस्रो स्थानमा नेपाली कांग्रेस छ । विजयी उम्मेदवार र दोस्रो स्थानमा मतपरिणाम ल्याएका उम्मेदवारको बिचमा मतान्तर धेरै छैन । यसरी हेर्दा वाम गठबन्धन बलियो अबस्था देखिएता पनि कांग्रसको लोकतान्त्रिक गठबन्धनमा आवद्ध दलले गर्दा चुनावी प्रतिस्पर्धा भने रोचक हुने देखिएको छ ।

जसमा वाम गठबन्धनको तर्फबाट माओवादी केन्द्रका हेमकुमार राई र लोकतान्त्रिकबाट नेपाली कांग्रेसकोतर्फबाट निवर्तमान सांसद बलबहादुर केसी उम्मेदवार बनेका छन् ।

प्रदेशसभा चुनावमा भने वाम गठबन्धनबाट एमालेका उत्तम बस्नेत प्रदेशसभा क मा र बुद्धिकुमार राजभण्डारी ख मा तथा कांग्रेसका प्रकाशसिंह कार्की क मा र आङगेलु शेर्पा ख मा उम्मेदवार हुनुहुन्छ । संविधानसभा अन्तर्गत २०६४ सालमा माओवादीले र २०७० सालमा कांग्रेसले जितेको सोलुखुम्बुमा यस पटकको चुनावमा भने वाम गठबन्धनले लोकतान्त्रिक गठबन्धनलाई कडा टक्कर दिने देखिन्छ ।

जिल्लाको तिगंलाबासीले आफूहरुको माग पूरा नभएको भन्दै स्थानीय तहको चुनाव पनि बहिष्कार गरेका थिए भने अबको चुनावमा पनि भाग नलिने बताएका छन । प्रतिनिधिसभाका लागि एउटा मात्र निर्वाचन क्षेत्र रहेको सोलुखुम्बुमा ६९ हजार ४ सय २२ मतदाता रहेका छन् ।