१५ दिन बिदा बस्ने तयारीमा जोशी,कस्ले ताेक्छ पेशी ?

काठमाडौं, १९  साउन। संसदीय सुनुवाइ विशेष समितिबाट प्रधानन्यायाधीमा दुईतिहाइ बहुमतले अस्वीकृत भएका कायममुकायम प्रधानन्यायाधीश दीपकराज जोशीले तत्काल राजीनामा नदिने भएका छन् । समितिबाट अस्वीकृत भएपछि जोशीले राजीनामा दिने धेरैले अनुमान गरेका थिए । करीब हप्ता दिनको माथापच्चिपछि शुक्रवार सुनुवाइ समितिको बैठकले जोशीको नाम दुईतिहाइ बहुमतले अस्वीकृत गरेको थियो । सुनुवाइ प्रक्रियामा सहभागी भएका नेपाली कांग्रेसका सांसदहरू भने निर्णय प्रक्रियामा सहभागी भएनन् । नेकपाका ९ र फोरमका १ सांसदसहित १० सांसदले जोशीको विपक्षमा मतदान गरेका थिए ।

बिदामा बस्ने तयारी

सुनुवाइ समितिको बैठकबाट अस्वीकृत भएपनि जोशीले राजीनामा नदिने मनस्थिति बनाएका छन् । उनी राजीनामा नदिएर १५ दिन बिदा लिने तयारी गरेको सर्वोच्च अदालत उच्च स्रोतले लोकान्तरलाई जानकारी दिएको छ । ‘भोलि (आइतवार) राष्ट्रपतिलाई भेटेर १५ दिनको बिदा लिने तयारीमा जोशी छन्,’ स्रोतले भन्यो । जोशी बिदामा बसेपछि वरिष्ठतम् न्यायाधीशले पेशी तोक्न सक्ने व्यवस्था छ । केसी बिदा बसेको खण्डमा वरिष्ठतम् न्यायाधीश ओमप्रकाश मिश्रले पेशी तोक्ने छन् ।

यस्तो हुन्छ प्रक्रिया

न्यायपरिषद्ले दीपकराज जोशीसँगै न्यायाधीश द्वय ओमप्रकाश मिश्र र चोलेन्द्रशमशेर राणाको नाम संवैधानिक परिषद्मा प्रधानन्यायाधीशका लागि सिफारिश गरेको थियो । अब सुनुवाइ समितिले जोशीको नाम अस्वीकृत गरिएको जानकारी संवैधानिक परिषद्लाई गराउने छ । त्यसपछि परिषद्ले अर्को नाम सुनुवाइका लागि पठाउने छ ।

संवैधानिक परिषद्ले न्यायपरिषद्बाट जोशीसँगै सिफारिश गरेका मिश्र वा राणामध्ये एकको नाम सिफारिस गर्नेछ । परिषद्ले सिफारिश गरेको ४५ दिनभित्र सुनुवाइ समितिले प्रस्तावित नाम स्वीकृत वा अस्वीकृत भएको जानकारी संवैधानिक परिषद्लाई गराउनुपर्ने व्यवस्था छ ।  गत फागुन ३० गते न्यायपरिषद्ले गोपालप्रसाद पराजुली प्रधानन्यायाधीश पदमा बहाल नरहेको जनाएपछि वरिष्ठताका आधारमा जोशी कायममुकायम प्रधान्यायाधीश बनेका थिए ।