​घरका छानाबाटै ६ सय मेगावाट बिजुली !

काठमाडौ,८ भदाै । छानाबाटा ६ सय मेगावाट बिजुली उत्पादन ! के यो सम्भव छ ? तर, एक अध्ययनले उपत्यकाको घरका छानाबाट ६ सय मेगावाट सौर्य उर्जा उत्पादन गर्न सकिने जनाइएकोछ । उर्जा क्षेत्रमा रहेका व्यवसायीहरुको संस्था इनर्जी डेभलपमेन्ट काउन्सिलका अनुसार उपत्यकामा यस्तो सम्भावना देखिएको हो । काउन्सिलका कार्यकारी सदस्य तथा सरल उर्जाका प्रमुख कार्यकारी आशिष चालिसेका अनुसार उपत्यकका २० प्रतिशत घरमा मात्र सोलार प्यानल राख्दामात्र ६ सय मेगावाट बिजुली उत्पादन गर्न सकिन्छ ।

चालिसेले एक कार्यक्रममा भने, ‘सन् २०११ को तथ्यांकमा उपत्यकमा ८ लाख घर थिए अहिले त्यो बढेर १० लाख पुग्यो त्यसको २० प्रतिशत अर्थात् २ लाख घरका छानामा मात्र सोलार प्यानल राखेर उत्पादन गर्दा ६ सय मेगावाट विजुली उत्पादन हुने देखिन्छ ।’ उपभोक्ताको घरमा जोडिएका त्यस्ता सोलारलाई ग्रिडमा जोड्ने र त्यसरी दिनभर उत्पादन भएको बिजुली प्राधिकरणले लिने राति उपभोक्ताले खपत गरेको बिजुलीको हिसाब पैसाको हिसाब मिलाउने व्यवस्था नेट मिटरिङ हो । तर, अहिलेको कानूनी व्यवस्थाले प्राधिकरणले बिजुलीकोमात्र मिटरिङ गर्ने, उपभोक्तालाई पैसा फिर्ता गर्ने व्यवस्था यसमा बाधक रहेको चालिसेको भनाइ छ ।

विद्युत प्राधिकरणका कार्यकारी अधिकृत कुलमान घिसिङले भने प्राधिकरणले घरायसी खालको नेट मिटरिङ सुरु गरिसकेको र अहिलेसम्म उपत्यकामा २० जना ग्राहक जोडिएको जानकारी दिए। अहिले नेट मिटरिङ जहाँ बिजुलीको मात्र मिटरिङ हुन्छ उपभोक्ताको विजुली खपतभन्दा धेरै भएमा पैसा दिने व्यवस्था मनी मिटरिङ नभएको उनले बताएका छन् ।