कति प्यारो रहेछ केही कर्मचारीका लागि वन मन्त्रालय! सरुवा हुनै नपर्ने
सारांश
- काठमाडौं ।
- निजामती सेवा ऐन मिचेर वन मन्त्रालयका केही कर्मचारी ३५ वर्षसम्म एउटै मन्त्रालयबाट कहिल्यै सरुवा भएका छैनन् ।
- निजामती ऐन अनुसार प्रत्येक दुईदुई वर्षमा कर्मचारीको सरुवा गर्ने व्यवस्था छ।
काठमाडौं । निजामती सेवा ऐन मिचेर वन मन्त्रालयका केही कर्मचारी ३५ वर्षसम्म एउटै मन्त्रालयबाट कहिल्यै सरुवा भएका छैनन् । निजामती ऐन अनुसार प्रत्येक दुईदुई वर्षमा कर्मचारीको सरुवा गर्ने व्यवस्था छ। त्यो ऐनमा रहेको व्यवस्थाले वन मन्त्रालयका केही कर्मचारीलाई तीनदशकसम्म छुन सकेको छैन ।
एउटै मन्त्रालयमा वा एउटै अफिसमा बसिरहँदा त्यहाँ अनियमितता हुने सम्भावना भएकाले दुईदुई वर्षमा सरुवाको प्रयोजन ऐनमै ल्याइएको हो । तर, ३५ वर्ष काम गरेर अवकास लिनेपनि वन मन्त्रालयमा कर्मचारी छन् । वन मन्त्रालयमा करिब ३५ वर्षमा काम गरेका अर्का कर्मचारी पदम सुवेदीले गत असारबाट अवकाश लिए। उनी जागिर खाउन्जेल एउटै ठाउँमा बसे ।
मन्त्रालयमा प्राविधिक समूहका कर्मचारीको दुईतीन वर्षमा पालैपालो सरुवा हुने गरेको प्रशासन सेवाका कर्मचारी भने कहिल्यै सरुवा हुँदैनन् । वन मन्त्रालयमा कार्यरत शाखा अधिकृत अञ्जनी राजवंशी ३० वर्षदेखि वन मन्त्रालयबाट कतै सरुवा भएकी छैनन् । योजना शाखामा कार्यरत उनी वन मन्त्रालयबाट सरुवा कहिल्यै भएकी छैनन् ।
वन मन्त्रालयका अर्का नायब सुब्बा रत्नलाल श्रेष्ठ योजना शाखामा काम गरेको २९ वर्ष पूरा भएको छ। वन मन्त्रालयका अर्का कर्मचारी सागर श्रेष्ठ १७ वर्षदेखि कतै सरुवा नभइ बसेका छन् ।
शुरुदेखि एउटै शाखामा बसेका कर्मचारीलाई सामान्य प्रशासन मन्त्रालयले सरुवा गरेपनि वन मन्त्रालयमै राख्ने गरेका छन्।
६ वर्षदेखि वन मन्त्रालयको स्टोर शाखामा रहेका नायब सुब्बा विश्व काफ्लेले राष्ट्रपति कार्यालयमा गरेको सरुवालाई मानेनन् । उनी वन मन्त्रालयमै बसे ।
प्रतिक्रिया