‘जय भोले’मा खगेन्द्रको नयाँ अवतार (भिडियो सहित)

काठमाडौँ, २१ भदौ । बहुप्रतिक्षित मानिएको फिल्म ‘जय भोले’को ट्रेलर सार्वजनिक भएको छ । खगेन्द्र लामिछाने, सौगात मल्ल, स्वस्तिमा खड्का, सलुन बस्नेत, बुद्धि तामाङ लगाएतका कलाकारको अभिनय रहेको चलचित्र ‘जय भोले’को ट्रेलर बिहिबार सार्वजनिक गरिएको हो । खगेन्द्र लामिछानेको कथा र अशोक शर्माको निर्देशन रहेको फिल्मलाई किरन शर्मा, कृति शर्मा र अंकित शर्माले निर्माण गरेका हुन् ।

फिल्ममा मुख्य आकर्षणको विषय खगेन्द्र बनेका छन् । सँधै सामाजिक कथामा भिज्ने खगेन्द्रका लागि यो फिल्म लेखन र अभिनय दुवै हिसाबले नौलो हो । यद्यपि उनले दर्शकलाई निराश बनाउने छैनन् भन्ने कुरा फिल्मको ट्रेलरबाट नै प्रष्ट हुन्छ ।

फिल्ममा प्रेम प्रशंगले प्रवलता पाएको देखिए पनि मुलत यो कमेडी फिल्म हो । सौगात र स्वस्तिमाको प्रेम सम्बन्धमा खगेन्द्र तघारो हुन आएका छन् । सौगात र खगेन्द्रको द्वन्द्वले फिल्ममा रोमाञ्चकता थप्ने काम गरेको छ । जिवन्त अभिनय कलाका कारण चिनिएका खगेन्द्रले आफू सबैखाले चरित्रमा भिज्न सक्ने कुरा यस फिल्मबाट प्रष्ट पारेका छन् ।

यो सौगात मल्ल र खगेन्द्र लामिछानेसँगै देखिएको पहिलो फिल्म हो । उसो त स्वस्तिमा पनि पहिलो पटक यी दुई ठूला कलाकारसँग एउटै पर्दामा देखिएको यो पहिलो पटक हो । तर सौगात र खगेन्द्रलाई सँगै देख्दा दर्शकको प्रतिक्रिया हेर्नलाएक हुनेछ ।

बुद्धि र खगेन्द्र भने योसँगै तेस्रो पटक सँगै देखिँदैछन् ।’टलकजंग भर्सेज टुल्के’ र ‘डमरुको डन्डिवियो’ मा उनीहरु सँगै देखिएका थिए । बुद्धिले ‘जय भोले’मा पनि खगेन्द्रको साथिको भुमिका निर्वाह गर्दैछन् । यो सबै सहित सलुन बस्नेत पनि यो धारका कलाकारसँग पहिलो पटक पर्दा साट्नेछन् ।
वडा दशैँको उपलक्ष्यमा रिलिज गरिने भनिएको फिल्मको फिक्स मिति भने तोकिएको छैन ।

भिडियाेः