जोर्डन आक्रमणको प्रतिशोध: इरानको ‘रिभोलुसनरी गार्ड’ माथि अमेरिकाको पहिलो प्रत्यक्ष हवाई हमला, ५० को मृत्यु

जोर्डनस्थित अमेरिकी सैन्य अखडामा इरान समर्थित समूहको घातक आक्रमणको जवाफमा अमेरिकी सेनाले इरानको अर्धसैनिक बल ‘रिभोलुसनरी गार्ड’ का रणनीतिक सैन्य संरचनाहरूमाथि भीषण हवाई आक्रमण सुरु गरेको छ। होर्मुज जलसन्धिलाई केन्द्रमा राखेर दुई देशबीच आठौँ दिनदेखि जारी यो सैन्य भिडन्तले मध्यपूर्वमा एकातर्फ सुरक्षा संकट गहिरिएको छ भने अर्कातर्फ विश्वव्यापी इन्धन आपूर्ति प्रणालीसमेत गम्भीर जोखिममा परेको छ। अन्तरिम शान्ति समझदारी विफल भएपछि सुरु भएको यस लडाइँले दुवै राष्ट्रलाई सोझो युद्धको सङ्घारमा पुर्याएको छ।

अमेरिकी सेनाको ‘सेन्ट्रल कमान्ड’ ले समुद्र र आकाशबाट टोमाहक क्रुज मिसाइल तथा लडाकु विमान प्रयोग गरी इरानका तटीय निगरानी, हवाई प्रतिरक्षा प्रणाली, क्षेप्यास्त्र र ड्रोन भण्डारणस्थलहरूलाई निशाना बनाएको छ। अमेरिकाले इरानभित्रका पुल तथा विद्युत् पूर्वाधारमा प्रहार गरेपछि जवाफमा इरानले पनि कुवेतका समुद्री पानी प्रशोधन र विद्युत् केन्द्रहरूलाई लक्षित गरी प्रतिशोध लिएको छ। इरानले आक्रमणको दायरा बढाउने धम्की दिएपछि संयुक्त अरब इमिरेट्स लगायतका छिमेकी देशहरूले आफ्नो सुरक्षा सतर्कता उच्च पारेका छन्।

जोर्डनको सैन्य अड्डामा भएको पछिल्लो आक्रमणमा दुई अमेरिकी सैनिकको मृत्यु भएपछि अमेरिकाले यो कठोर कदम चालेको हो, जहाँ हालसम्म १६ अमेरिकी सैनिकले ज्यान गुमाइसकेका छन्। अमेरिकी रक्षा मन्त्रालयले जारी गरेको भिडियोहरूमा पहाडी सुरुङभित्र रहेका इरानी सैन्य आधारहरू ध्वस्त पारिएको देखिन्छ। यता इरानी अधिकारीहरूका अनुसार अमेरिकी हवाई हमलाका कारण हालसम्म कम्तीमा ५० जनाको मृत्यु भएको छ भने ५०० भन्दा बढी नागरिक तथा सुरक्षाकर्मी घाइते भएका छन्।

 विश्वको कुल तेल र प्राकृतिक ग्यासको पाँचौँ भाग ओसारपसार हुने मुख्य जलमार्ग होर्मुज जलसन्धि नै युद्धको केन्द्र बनेकाले अन्तर्राष्ट्रिय बजारमा इन्धनको हाहाकार हुन सक्ने विज्ञहरूले चेतावनी दिएका छन्।