प्रधानमन्त्रीले गरे बाढी प्रभावितको आकाशबाटै निरीक्षण

विराटनगर ।  प्रधानमन्त्री शेरबहादुर देउवासहित उच्च सुरक्षा अधिकारीको टोलीले अविरल वर्षापछि आएको बाढीबाट प्रभावित पूर्वी नेपालका जिल्लाको हवाई निरीक्षण गरेका छन् ।

प्रधानमन्त्री देउवाले सोमबार दिउँसो झापा, मोरङ, सुनसरी र सप्तरीको बाढी प्रभावित क्षेत्रको हेलिकप्टरबाट निरीक्षण गरेका छन । उनीसँगै निरीक्षणमा आधा दर्जन मन्त्रीले पनि हेलिकप्टरबाट बाढी र डुबान क्षेत्रको अवलोकन गरेका छन् ।

प्रधानमन्त्रीसँगै रक्षामन्त्री भिमसेन दास प्रधान, गृहमन्त्री जनाद्र्धन शर्मा र सुरक्षा निकायका प्रमुखहरु सवार पहिलो हेलिकोप्टरले पूर्वी नेपालको बाढीप्रभावित क्षेत्र निरीक्षण गरेको हो ।

आकाशबाटै निरीक्षण गरेपछि प्रधानमन्त्री देउवा सुनसरी इटहरीस्थित नेपाली सेनाको पृतना कार्यालयमा ओर्लिर बाढी त्यसको प्रभाव र वस्तुस्थितिबारे जानकारी लिएका छन् । प्रधानमन्त्रीले राहत तथा उद्धारमा कुनै कमजोरी नगर्न निर्देशन दिएका छन ।

उपप्रधानमन्त्री विजयकुमार गच्छदारको नेतृत्वमा आएको दोस्रो हेलिकप्टरले पनि बाढी प्रभावित क्षेत्रको हवाई निरीक्षण गरेको छ । गच्छदारसँगै अर्थमन्त्री ज्ञानेन्द्र कार्की, वाणिज्य मन्त्री मिनकुमार विश्वकर्मा त्यो टोलीमा थिए । प्रधानमन्त्री देउवा सोमबार नै काठमाडौ फर्किने सुरक्षास्रोतले जनाएको छ ।