अब नवराज सिलवाल ९२ देशको प्रहरीको निगरानीमा

काठमाडौं, माघ ८ । नेपाल प्रहरीले पूर्व प्रहरी नायव डीआईजी तथा ललितपुर क्षेत्र नम्बर १ का सांसद नवराज सिलवाललाई नेपालमा फेला पार्न नसकेपछि अन्तर्राष्ट्रिय प्रहरीहरुको संगठन (इन्टरपोल) गुहारेको छ ।

नेपाल प्रहरीले इन्टरपोलमार्फत डिफ्युजन नोटिस जारी भएपछि अब सिलवाललाई एक सय ९२ देशका प्रहरीले निगरानीमा राख्ने छन् । उच्च स्रोतका अनुसार सिलवाल नभेटिएपछि प्रहरीले इन्टरपोलको सहयोग मागेको हो ।

सरकारी कागजात कीर्ते गरेको आरोपमा सिलवालमाथि काठमाडौं प्रहरीले छानविन अगाडी बढाएको छ । उनी काठमाडौं प्रहरीमा बयान दिन नगएपछि प्रहरी प्रधान कार्यालयले देशभरका प्रहरी कार्यालयलाई पत्राचार गरी खोजीका लागि निर्देशन दिएको थियो ।

‘सिलवामाथि काठमाडौं प्रहरीले छानबिन गरिरहेको छ, जिल्लाका सबै अनुसन्धानका कुराहरु मलाई थाहा पनि हुँदैन । अनुसन्धान भइरहेका विषय बाहिर ल्याउन मिल्दैन’ नेपाल प्रहरीका प्रवक्ताले जानकारी दिए ।

यसअघि काठमाडौं प्रहरीले ललितपुर परिसरलाई समेत सिलवालको खोजीका लागि पत्र काटेको थियो । ललितपुरले नभेटेपछि देशभरका प्रहरीसँग समेत सहयोग मागिएको थियो । ललितपुर क्षेत्र नम्बर १ एमालेबाट सांसदमा विजयी सिलवालले सञ्चारमाध्यममा आफू ललितपुरबासीसँगै रहेको बताएपछि आइतबार प्रहरी टोली भट्टेडाँडामा खोजी गर्न पुगेको थियो । तर उनी नभेटिएपछि प्रहरी रित्तो हात फर्किएको थियो ।