आफुलाई अयोग्य भन्नेलाई अमेरिकी राष्ट्रपतिले के भने ?

अमेरिकी राष्ट्रपति डोनल्ड ट्रम्पले आफुलाई अस्थिर र असक्षम व्यक्तिको आरोप लगाउने एउटा पुस्तक कल्पनामा आधारित रहेको भन्दै आफु पुस्तकमा भनिए जस्तो असक्षम र अस्थिर नरहेको बताएका छन् । पत्रकार माइकल बुल्फले लेखेको उक्त पुस्तकमा लेखकले राष्ट्रपति ट्रम्पलाई उनका निकट सल्लाहकारले पनि राष्ट्रपति पदका लागि उनी योग्य रहेको बारे प्रश्न गरेको उल्लेख गरिएको छ । ‘फायर एण्ड फ्युरी’ नामक उक्त पुस्तक सार्वजनिक नहुँदै अहिले विश्वव्यापीरुपमै चर्चित बनेको छ । पुस्तकका आफुबारे लेखिएका नकरात्मक टिप्पणीलाई लिएर ट्रम्प चिन्तित बनेको समेत देखिएको छ । केही दिन अघि राष्ट्रपति निकट वकिलहरुले पुस्तक सार्वजनिक हुनबाट रोक्न गृहकार्य सुरु गरेको समाचार समेत बाहिरिएको थियो । ट्रम्पले पुस्तकका लेखकलाई धोकेवाजको संज्ञा दिएका छन् ।