उदयपुरको त्रियुगा नगरपालिकाभित्र विद्युतीय समस्या, सरोकारवाला मौन

अस्बिन खड्का

उदयपुर, १२ साउन । लोडसेडिङमुक्त नेपाल भनी कुलमान घिसिङको चौतर्फी तारिफ भइरहेको छ । देशलाई लोडसेडिङमुक्त बनाउन सफल भएपनि उदयपुरको त्रियुगा नगरपालिका र आसपासका ठाउँहरुमा २ महिना अगाडिदेखि विद्युत आउने र जाने समस्याबाट सदरमुकामबासीहरु दिक्क भएका छन् ।

विद्युतीय उपकरणहरुको सुविधान लिनबाट गाईघाटवासी वञ्चित भएका छन् । गाईघाट बजारमा साइबर चलाएर बसेका कुमार राईले भने, “यो १०÷१० मिनेटमा बिजुली आउने र जाने समस्याले गर्दा ३ वटा कम्प्युटर कामै नलाग्ने गरी बिग्रिए ।” पबिन फोटो स्टुडियोका सञ्चालक पबिन राईको पनि यही समस्या छ । उनले पटकपटक बिजुली जाने र आउने गर्दा फोटो धुलाउने नयाँ मेसिन काम नलाग्ने गरी बिग्रिएको बताए ।

विद्युतको समस्याले बैंकको काममा पनि ढिलासुस्ती हुने गरेको छ । यसले गर्दा सेवाग्राहीहरुले सास्ती ब्यहोर्न वाध्य छन् । देशकै ठूलो उदयपुर सिमेन्ट उद्योगको पनि ठूलो मेसीन सर्ट भएर बिग्रिएको र नयाँ फेर्नु परेको उदयपुर सिमेण्ट उद्योगका महाप्रबन्धक सुरेन्द्र पौडेलले बताए ।

नेपाल विद्युत प्राधिकरण शाखा गाईघाटका प्रमुख राम अरोध्या यादवले यो समस्या सिरहा लहानको प्रसारण केन्द्रबाट नै देखिएको बताए । यो समस्या आफूहरुले जानकारी गराएको तर वर्षाका कारण काममा ढिलासुस्ती भएको जानकारी दिए । यादवले बीच बीचमा ट्रान्सफरहरुको चेकजाँच भइरहेको र केही दिनमै यो समस्या समाधान हुने बताए ।