ओलीलाई प्रधानमन्त्री बनाउन माओवादीले माग्यो यी तीन पद

काठमाडौं, पुस १२ । माओवादी केन्द्रलाई राष्ट्रपति, सभामुख र पार्टी अध्यक्ष पद दिए माओवादीले एमाले अध्यक्ष केपी ओलीलाई प्रधानमन्त्री बन्न सहयोग गर्ने बुझिएको छ ।

पार्टी एकतापछि एउटा पार्टीको प्रधानमन्त्री भए अर्को पार्टीको पार्टी अध्यक्ष हुनुपर्ने माओवादी नेताहरुको भनाई छ । तर, एमाले नेताहरुले संसदको ठूलो पार्टी एमालेका अध्यक्ष नै पार्टी अध्यक्ष र प्रधानमन्त्री हुनुपर्ने भन्दै आइरहेका छन् ।

पार्टी अध्यक्ष र नयाँ बन्ने सरकार गठनमा एमाले–माओवादीबीच खटपट सुरु हुन थालेको हो कि भन्ने आशंकालाई बल पुगेको छ । पार्टी एकताका लागि दबाब बढाउन भइरहेको दौडधुप र गृहकार्य हेर्दा एमाले–माओवादीका अध्यक्षबीच अहिले केही आशंकाले घर घेरेको छ ।

माओवादीले यसरी सबै महत्वपूर्ण उच्च पदमा दाबी गरेपछि केपी ओली झस्किएका छन् । ओलीका अगाडि माओवादीलाई ‘सर्वस्व’ सुम्पिएर आफू प्रधानमन्त्री बन्ने कि पार्टी र मूल्य–मान्यता जोगाएर प्रधानमन्त्री पद प्राप्तिको बाटो छोड्ने भन्ने प्रश्न यतिबेला ओलीका अगाडि खडा भएको छ ।

तर, प्रधानमन्त्री बन्नकै निम्ति माओवादीलाई राष्ट्रपति, सभामुख र पार्टी अध्यक्ष पद सुम्पन नसकिने निचोडमा भने ओली पुगेका छन् ।

माओवादीले निहुँ खोज्न थालेको संकेत पाएपछि ओलीले संघीय फोरमका अध्यक्ष उपेन्द्र यादवसँग संवाद गरेका छन् । गत सोमबार (३ गते) बालकोटस्थित आफ्नै निवासमा निमन्त्रणा गरेर ओलीले यादवसँग वार्तालाप गरेका हुन् ।

राष्ट्रिय सभाको निर्वाचन, अध्यादेश र सरकार गठनलगायतका विषयमा दुई नेताबीच भएको छलफलका क्रममा ओलीले यादवलाई वाम गठबन्धनमा सामेल हुन आग्रह गरेका थिए ।

ओलीको आग्रहलाई सकारात्मक रूपमा लिँदै यादवले मधेसका कतिपय मुद्दामा उदारता दर्शाउन ओलीलाई अनुरोध गरेका थिए । वार्ता सकारात्मक भए पनि यो टुङ्गोमा पुगिनसकेको बुझिएको छ ।

नेपाली कांग्रेसको नेतृत्व र अन्य कतिपय शक्तिकेन्द्रहरूले प्रचण्डलाई पाँच वर्षका लागि प्रधानमन्त्री बनाइदिने वचन दिएपछि केही दिनयता प्रचण्ड वाम गठबन्धनप्रति उदासीनता देखाउँदै छन् ।