कुसुमलाई जन्मकैदको फैसला

काठमाडौं । पोखरामा एक बालिकाको हत्यापछि पक्राउ परेका आरोपितलाई जिल्ला अदालतले जन्मकैदको फैसला सुनाएको छ । कास्की जिल्ला अदालतका न्यायाधीश योगेन्द्रप्रसाद शाहको इजालसले कुसुम पौडेललाई जन्मकैदको सजाय सुनाएको हो ।

गत असोज ९ गते पोखरा २२ पुम्दीभुम्दीकी १० वर्षीय श्रेया सुनारको बलात्कारपछि हत्या गरेको आरोपमा पक्राउ परेका कुसुम पौडेललाई अदालतले जन्मकैदको फैसला सुनाएको हो । हत्या आरोपमा कुसुम गत असोज १० गते नै पक्राउ परेका थिए ।

घर नजिकै पसलमा बिस्कुट किन्न गएकी श्रेयालाई पैसाको प्रलोभन देखाएर कुसुमले बलात्कारको प्रयास गरेका थिए । त्यसको श्रेयाले प्रतिकार गर्न खोजेपछि रक्सीले मातेका कुसुमले घाँटी थिचेका थिए ।

पोखरा महानगरपालिका–२२ निवासी मीनबहादुर विकको जाहेरीले स्याङ्जाका घर भई पोखरा कोदी बस्दै आएका २७ वर्षीय कुसुमलाई अदालतले जन्मकैद सुनाएको हो ।