टिप्परले फेरि हान्यो काभ्रेमा मोटरसाइकल, एकजनाको मृत्यु

काठमाडौं, ७ साउन । टिप्परले फेरि काभ्रेमा एक मोटरसाइकललाई ठक्कर दिएको छ । टिप्परको ठक्करबाट मोटरसाइकल चालकको मृत्यु भएको छ ।

बनेपा बजारको चार दोबाटो नजिकै बा २ ख ३९३४ नम्बरको टिप्परले ठक्कर दिँदा बा ८३ प ५०७७ नम्बरको मोटरसाइकल चालकको मृत्यु भएको हो । बनेपा प्रहरीले दिएको जानकारी अनुसार मोटरसाइकल चालकको सनाखत हुन सकेको छैन ।

मोटरसाइकल चालकको ज्यान गएपछि जम्मा भएको भीडले टिप्परमा आगजनी गरेको छ । टिप्परको ठक्करबाट ज्यान जाने क्रम बढेपछि सरकारले राजधानी उपत्यकामा दिउँसोको समयमा टिप्पर सञ्चालनमा रोक लगाएको छ ।

यही साउन १ गतेबाट काठमाडौँ, भक्तपुर र ललितपुरमा दिउँसोको समयमा टिप्पर चलाउन रोक लगाइएको थियो । उपत्यकामा दिउँसो टिप्पर चलाउन रोक लगाइए तापनि उपत्यका बाहिरको काभ्रेमा टिप्परले ज्यान लिएको हो ।