दशैंको चौथो दिन कुष्माण्डा देवीको पूजा गरिदै

दशैको रौनकता दिनप्रति दिन बढ्दै गइरहेको छ । घटस्थापनादेखि सुरु भएको बडा दशैँको आज चौथो दिन, आज पनि शक्तिपीठ तथा देवी मन्दिरहरुमा गई सर्वसाधाराणले पूजाआजा तथा शक्तिको आराधना गरेका छन् । बडा दशैंको नवरात्र भरि फरक फरक देवीको विशेष पूजाआजा गर्ने क्रममा चौथो दिन कुष्माण्डा देवीको पूजा गर्ने प्रचलन छ । सोही अनुरुप आज विहानैदेखि शक्तिपीठ तथा घरघरमा कुष्माण्डा देवीको पूजा र आराधना गरिदैछ ।

कुष्माण्डा देवीलाई शुभकर्म थालनी वा सृष्टिको प्रतिक मान्ने धार्मिक परम्परा रहेको छ । आफ्नो उदरमा त्रिविध ताप धारण गरी संसारको सृष्टि गर्न कुष्माण्डा देवीको आविर्भाव भएको धार्मिक ग्रन्थहरुमा उल्लेख गरिएको पाइन्छ ।

काठमाडौंको दक्षिणकाली, भद्रकाली, मैतीदेवी, नक्साल भगवती तथा देशभरका शक्ति पीठहरुमा नवरात्रभर विशेष पूजा आराधना गरिन्छ । असत्यमाथि सत्य र आसूरी शक्तिमाथि दैवीशक्तिको विजयका रुपमा मनाइने बडादसैंमा ९ दिनसम्म विभिन्न शक्तिपीठमा भक्तजनको घुइँचो लाग्ने गर्दछ ।