नयाँ वर्षकै दिनमा मात्रै फुल्ने ‘फूल’ प्रकृतिको एउटा उपहार

काठमाडौं । सिराहामा एउटा अचम्मकै फूल जुन नयाँ वर्षमा मात्रै फुल्छ । पत्येक वर्षको बैशाख १ मा त्यो फूल फूल्छ । सिराहाको लहान नगरपालिका सलहेस फूलवारीमा फुल्ने माला आकृतिको सुनाखरी जस्तै देखिने सेतो रङको फूललाई प्रकृतिद्वारा दिइएको नयाँवर्षको उपहार मिथिलावासीले मान्ने गरेका छन्।

सलहेस फूलवारीमा फुल्ने फूल मिथिलाका लोकनायक सलहेस गाथासँग सम्बन्धित छ। स्थानीय लोकआस्थासँग जोडिएको यो फूल दशकौंदेखि फुल्दै आएको छ । त्यस फूललाई अलौकिक मानेर हेर्न भव्य मेला लाग्ने गरेको छ । हरेक वर्षजस्तै यस वर्ष पनि लहान बजारदेखि ३ किलोमिटर पश्चिम दक्षिणमा रहेको सलहेसमा फूल हेर्नेको भीड लाग्यो ।

फूलवारीको असंख्य रूखमध्ये मालिनी मन्दिर दक्षिण टाँसिएको हारमको दुईवटा रूखमा प्रत्येक नयाँ वर्ष बैशाख १ मा माला जस्तै आकारमा देखिने सेतो रङको फूल फुल्छ। नयाँ वर्षमा मेला भर्न आउने दर्शनार्थीको मुख्य आकर्षण यही फूल बन्ने गरेको छ । फूल मुर्झाए पनि भूइामा झर्दैन स्थानीयको दाबी छ ।